عرب مسلمان امریکہ ءَ "نائن الیون" ءِ وڑيں اُرش كُرت نہ كن اَنت،مهاتير محمد

ميان اُستمانى(هال)  ملیشیاءءِ سارى ءِ مزن وزير مهاتير محمد ءَ گوشتگ كہ عرب مسلمان امریکہ ءَ "نائن الیون" ءِ وڑيں اُرش كُرت نہ كن اَنت، كہ چرايشى ءَ سئے هزار مَردم بيران بيتگ۔ مہاتیر نائن الیون ءِ وهد ءَملیشیاءءِ مزن وزير بيتگ ءُ  آ  بيست ءُ دو سال ءِ مزن وزيرى ءَ رَند چه اُگده ءَ دزكش بيتگ۔ ميان اُستمانى ندكارءُ نامی ئیں كتاب"ايشيا"ءِ نويسوک مہاتیر ءَ وتى كُڈّک(بلاگ) ءِ تہ ءَ  مروچى نبشتہ كنان ءَ گوشتگ كہ امریکہ ءِ سارى ءِ صدر  بش ءَ صدام حسین  ءِ گور ءَ ساهدار كُشيں سلاهانى هست بيگ ءِ بابت ءَ دروگ بستگ،اگاں آ پہ عراقيانى،افغانىیانی ءُ امريكى فوجىیانی كوشارينگ ءِ دروگ بست كنت گڑا "نائن الیون"ءِ دَرگت ءَ هم دروگ بندگ ءَ چک ءُ پد نہ بيت۔ مہاتیر محمد ءَ  "نائن الیون"ءِ اُرش امریکی سركار ءِ سازشے گوشتگ، آئى ءَ نبشتہ كنان ءَ گوشتگ كہ عرب سلاه بندانى واستہ چوشيں اُرشانى توجيل ءُ راهبندانى  ٹہينگ گرانيں كاريے، آ دُشمن ءَ چوشيں تاوان دات نہ كن اَنت۔ ايشى ءَ پيسر هم مہاتیر ءَ مغربى سامراج ءِ سرءَ باز ايراد گپتگ ءُ آ یہودی ءُ امریکہ مخالفے زانگ بيت۔ آئى ءَ پيش ءَ اے گپ هم جتگ،اگاں امریکہ" تھری ڈی سائنس" فلم جوڈ كُرت كنت تا "نائن الیون" ءِ وڑيں فلم هم جوڈ كُرت كنت آئى ءَ گوشتگ پكّائیں ثبوت ءَ گوں من گوش آں کہ "نائن الیون"ءِ اُرش سازشى بيتگ، ءُ اے توجيل ءِ سازوک جارج بش ءُ ٹونی بلیئر اَنت۔ آئى ءَ گوشتگ بایديں ايشانى سرءَ جنگی جرائم ءِ درگت ءَ مقدمہ هلائينگ به بيت۔