بلوچستان ءَ سھر ءُ پیتل درجنگ ءِ کار مھتل یا ھلاس بوت کن اَنت ' وال اسٹریٹ جنرل

شال: امریکہ ءِ نامی ئیں ھالتاک ' وال اسٹریٹ جنرل ' ءِ رپورٹ ءِ رد ءَ  پاکستان چیر دستیں بلوچستان  سرکار ءِ نیمگ ءَ بازیں جست ءُ پرساں پد چَہ پاکستان ءِ چیر دستی ءَ بلوچستان ءَ بیوکیں پیتل ءُ سھر ءِ دیمروی  ءَ کار مھتل بوت کن اَنت یا اے شور پہ  ھلاس ھم بوت کن اَنت ۔ بلوچستان سرکار ءِ نیمگ ءَ گوشگ بوتگ کہ پہ  نام گیپتگیں مڈیاں کل جنگ ءِ لیزگزارش ناسرجم اِنت ءُ کَل جنگ ءِ راھبند ءَ گوں ھمدپ نہ اِنت ۔ کل جنوکیں کمیٹی ءَ مار اِتگ کہ گزارش دیوک ءِ نیمگ ءَ پیش کرتگیں گزارش جوان نہ اِںت ءُ اے لیز پہ سرکار ءُ بلوچستان ءِ مھلوک ءِ نپ ءَ نہ اِنت ، لیز کاگد نا سرجم اَنت ۔ اے ھبر کہ پاکستان چیر دستیں بلوچستان سرکار ءِ نیمگ کنگ بوتگ اَنت ایشانی نمدی امریکی ھالتاک ءِ گور ءَ ھست اَنت ۔ سرکار ءَ کمپنی ءَ پہ اے ھبرانی پسو دیگ ءَ سی روچ ءِ موہ داتگ ۔  گمان اِنت کہ سئے سال ءِ تہ ءَ چَہ کمپنی ءِ نیمگ ءَ اے کار ءِ تہ ءَ 3.4ارب ڈالر ءِ سرمایہ کاری ھلاس کنگ بہ بیت ۔ اے رد ءَ پاکستان ءِ یک نامی ئیں ھال رسانکے ءَ ھال دیان ءَ گوشتگ کہ پاکستان ءِ دپتر ءِ چَہ درساں مستریں سرمایہ کاری اِنت کہ ھلاس بوگ ءِ نزیک اِنت ۔ زانگ بہ بیت کہ پاکستان چیر دستیں بلوچستان سرکار ءَ چد ءُ پیش ریکوڈک پلان ءِ سر ءَ ھم بے تاھیری دررشانتگ ءُ ھمے پیم گوادر پورٹ ءِ ھم سنگاپورپورٹ اتھارٹی ءِ دیگ ءِ سر ءَ ایراد گیپتگ بلے اے درائیں ھبر گوات ءَ برتگ اَنت ءُ گڈی ءَ ھما کہ پاکستانی واکدارانی دل ءَ گوشتگ ھما رنگ ءَ کنگ بوتگ ۔