بیت المقدس: یہودی بنیاد پرست بیت المقدس ءَ داخل بیتگاں۔

بیت المقدس:ھالانی ردا یہودی بنیاد پرستیں ملایانی مزنیں لڑے بیت المقدس ءَ داخل بیتگاں۔ دومی نیمگ ءَ فلسطینی ملا ھم قبلہ اول ءِ نگھپانی یے ھاترا سر بیتگاں۔ مرکزی ھال رساں فلسطین ءِ ردا ازرائیلی فوج ءِ مزنیں کچی یہودیانی نگھپانی ءَ کنگ ءَ آں۔ مسجد اقصٰی ءِ سرجمیں ڈنی ءُ دری دروازگ ازرائیلی فوج ءَ بند کتگاں۔ مسجد اقصٰی ءِ کوھنیں ءُ نوکیں راھانی سرا ازرائیلی فوج گشت جنگیں۔ ھالانی ردا یہودی ملا ازرائیلی پولیس ءُ فوج ءِ نگھپانی ءَ اقصٰی مسیت ءِ مراکشی دروازگ ءَ پترگ ءَ آں۔ گپ اش انت کہ یہودی ملایانی گل ”العاد” ءَ گوں دگہ بنیاد پرستیں گلاں ھوار یک شنبہ ءِ روچ ءَ اقصٰی مسیت ءِ جاہ ءَ ھیکل سلیمانی ئے بن ھشت ایر کنگ ءِ جار جتگَ۔ ازرائیلی نائب وزیر اعظم سلیفان شالون ءَ ھم مذھبی بنیاد پرستیں ملایانی پلہ مرزی ئے جار جتگ۔ اے جار ءَ پد مرچی یہودی ملایانی مزنیں کچی اقصٰی مسیت ءَ سر بیتگان۔ اے درگت ءَ فلسطینی آنی ھم مزنیں کچی نگھپانی ءِ ھاترا اقصٰی مسیت ءِ چاگرد ءَ سر بیتگاں۔ بلے ازرائیلی فوج فلسطینی مسلماناں اقصٰی مسیت ءِ پترگ ءَ نیلگ انت۔ فلسطینی آں یہودی ملایانی اقصٰی تھا پترگ ءِ پژگرد ءَ ازرائیل ءِ ھلاپ ءَ زھر شانی کتگ۔