بلوچستان یونین آف جرنلسٹ ءَ پہ بلوچ اھوالکاراں ھچ رنگیں گامگیج نہ زرتگ ، قاضی ریحان

گوادر : گوادر پریس کلب ءِ باسک ءُ کالم نویس قاضی داد محمد ریحان ءَ بلوچستان یونین آف جرنلسٹ ایرجتگ ءُ گوشتگ کہ بلوچستان یونین آف جرنلسٹ یک کمزور، لگور ءُ پہ لھتیں مردمانی لبانی پھریزگ ءَ جوڑ بوتگیں گلے ۔  نام گیپتگیں گل ءَ دنیگت بلوچ اھوالکارانی جیڑھانی گیشینگ ءُ آھانی پھریزگ ءَ ھچ رنگیں جوانیں گامگیج نہ زرتگ ۔ شھید لالہ حمید ءِ آوار جنگ ءَ پد دنیا ءِ اھوالکارانی گل  ھال دیگ بوتگ اَنت بلے آھانی شال ءُ اسلام آباد ءَ  نندوکیں جھگیراں اے ھبر مزن بوگ ءَ نہ اِشتگ چہ ھمیشانی کارپداں آوار جنوکاں لالہ گوں آسانی ءَ شھید کرت ۔ گوستگیں روچ ءَ یونین ءِ روتاکاں چاپ بوتگیں بیان ءِ وانگ ءَ پد اجکہ بوتگ آں کہ ایشی ءِ تہ ءَ نامداریں بلوچ کالم نویس جاوید نصیر رند ءِ آوار جنگ ءِ  درگت ءَ ھچ گوشگ نہ بوتگ ۔آئی ءَ گوشتگ کہ وھدے یونین ءِ مزنمرانی سراں گرند کپ اِیت گڑا شُور کن اَنت ءُ شوربند اَنت  بلے وھدے کہ بلوچستان ءِ راستیں اھوالکار جنجالاں دوچار بنت گڑا اے گامگیج زورگ ءِ بدل وتی دیوانانی تہ ءَ آھاں دھشت گرد گوش اَنت ۔بلوچستان ءِ تچک ءُ راستیں اھوالکار شال ءَ نشتگیں یلو جرنلزم ءِ رودینتگیں  نہ اَنت بلکیں بلوچستان ءِ پدمنتگیں ھنکین ءُ شھراں کارکنوکیں ورکنگ جرنلسٹ اَنت ۔ آَئی ءَ گوشتگ کہ نام گیپتگیں گل ءَ ھال اِنت کہ گوں منی پجیگ ءَ گوادر ھنکین ءِ سئے اھوالکار غوث بھار ءُ جاوید سعیدءَ کشنندہ رند ءَ اَنت پمیشکا آ چَہ گوستگیں بازیں ماھاں چیر ءُ نہ گیگیں زند گوازینگ ءَ لاچار اَنت ۔ مروچگیں دیوان ءِ تہ ءَ چَہ آھاں جست کنگ بہ بیت کہ پہ آھانی زند ءِ پھریزگ ءَ چونیں گامگیج زورگ بوتگ ؟ دیوان ءِ ایجنڈھانی تہ ءَ پہ جاوید نصیر ءِ آوار جنگ ءُ نام گیپتگیں اھوالکارانی جنجالاں اول سر ءَ کنگ ءَ مکران ءِ اھوالکار وتی گچینی کردار ءَ پیش بہ کن اَنت ءُ نام گیپتگیں ادارہ ءِ سروکاں فون بہ کن اَنت ءُ آھاں وتی ھیال ءَ بہ گوش اَنت ۔