چابھار : لبزانکی گل ءِ چیردستی ءَ مزنیں مراگشے برجم دارگ بوتگ

چابھار : گوستگیں آدنیگ ءِ روچ ءَ چابھار ءِ میتگ گلشھر ءَ چَہ چابھار لبزانکی گل ءِ نیمگ ءَ پہ کسانیں اَئید ءِ درگت ءَ یک مزنیں مراگشے برجم دارگ بوتگ ۔ اےمراگش ءِ تہ ءَ تامر، کسمانک ، ساز ءُ زیمل ءُ لچہ گوشی بھر ھوار بوتگ ۔ لچھی دیوان ءِ پاگواجہ نامی ئیں آزمانک نویس ، زیمل کار ءُ لچہ گوش اُستاد تاج محمد طاھر بوتگ۔ دیوان ءَ اُستاد غلام  رسول دینار زھی ءَ ھم  سوت ونتگ ءُ مردمانی بالاد وشنود کرتگ۔ مراگش ءِ جار چین بلوچی زبان ءِ نامی ئیں لوزانکار ءُ لچہ گوشی ءَ نامدار علی بخش دشتیاری بوتگ ۔ دیوان ءَ چَہ چابھار ءَ ابید کنارک ، پھرہ ءُ دگہ کش ءُ گور ءِ ھند ءُ دمگانی لچہ گوش ءُ  مھلوک ءَ بھر زرتگ ۔دیوان ءَ ھال رسگ ءَ پد دیوان ءَ پہ نامی ئیں پھلوان بشام ءَ کہ گوستگیں روچ ءَ ماں تربت نادرھجاہ ءَ چَہ کوڑھیں دنیا ءَ لڈ اِتگ یک منٹَے  گوں بے تواری ءَ گوازینگ ءُ پہ آئی ءِ ارواہ ءَ مرواند بوتگ اَنت ۔ دیوان ءَ پہ شھید اُستاد کندیل بلوچ ءِ یاتگیری ءُ آئی ءِ جھدانی ستا ءَ ھم لچہ گوشگ بوتگ ۔ دیوان ءِ جارچین ءَ یک نوک باھندیں جنینے لچہ کارے ھم لچھے ونتگ بلے آئی ءِ نام ئِے پدر نہ کرتگ ءُ پہ مھلوک ءَ یک جستے اِیشتگ کہ آ بہ زان اَنت کہ ابید چَہ بلوچ مردین آدماں زال ھم لچہ کاری ءُ لوزانک ءَ گوں ھمگرنچ اَنت ۔ دیوان ءِ تہ ءَ کسانیں کساسے ءَ جنین آدماں ھم بھر زرتگ ۔