شال : بی این پی ءِ زھرشانی

شال : بلوچ سیاسی کارکنانی ابید چَہ دادجاہ  ءِ پرمان ءَ دزگیر کنگ ، بیگواہ کنگ ءُ  آھانی گوں تیراں سمب  اِتگیں میتانی دز کپگ ءِ کارپدانی ایرجنگ ءَ بلوچستان نیشنل پارٹی ءِ باسکاں زیک آدینگ ءِ روچ ءَ اد ءَ شال پریس کلب ءِ دیم ءَ زھرشانی کرتگ ۔ اے درگت ءَ بنجاھی کارگشاد آغاحسن بلوچ ایڈوکیٹ ، غلام رسول مینگل ، غلام نبی مری ، ملک مجید کاکڑ ، بی ایس او ءِ ھاشم بلوچ ، محمد جان بلوچ ءُ دگراں بلوچ نسل کش پالیسی ایرجتگ ءُ گوشتگ کہ شھزاد زھری ، صاحب جان رند ءِ سولہ ایم پی او ءِ سر ءَ دزگیری ، خلیل بلوچ ءُ دگہ بلوچ بچانی دیم شرتگیں میتانی دزکپگ بلوچ دژمنی ءِ آمرانی شوربندیانی درچ اِنت ۔ ما چَہ بنداتی روچاں گوشان ءُ پیداک اِیں کہ گوں اسٹبلشمنٹ ءَ ڈیل کنگ ءَ پد سرکار جوڑ کنوکیں پارٹی ءَ گوں آئین ءُ اُستمانی ھاکمی کنگ ءَ  ھچ کار نیست ءُ نہ کہ نامے اُستمانی ھاکماں گوں بلوچاں دوستی ھست بلکیں اے  پہ اسٹبلشمنٹ ءِ لوٹانی پھازگ ءَ کار کنگ ءَ اَنت ۔ بلوچ راج ءِ آبادی کم کنگ ءُ بلوچ راج ءِ مڈیانی دستیگ کنگ لوٹ اَنت مردم شماری ءِ تہ ءَ گوں بلوچ ءَ بوتگیں کارپداں اے پدر بیتگ ۔ یک نیمگے بلوچستان ءَ طالبان ءُ مذھبی انتہا پسندانی پلہ مرزی کنگ بوگ ءَ اِنت دومی نیمگ ءَ پہ دنیا ءِ رد دیگ ءَ گوں دھشت گرداں جنگ کنگ ءِ ناٹک بوگ ءَ اِنت ۔