بلوچاں سئے مزنیں جنجال دیم ءَ اِنت ءُ اول بے روزگاری اِنت ' ڈاکٹر مالک

شال : پاکستانی سینیٹر ءُ نیشنل پارٹی ءِ کماش ءَ گوشتگ کہ بلوچ سرزمین ءِ سر ءَ بیوکیں دھشت گردیاں نہ ایوک  پہ بلوچستان ءَ بلکیں پہ سرجمیں دمگ ءِ ایمنی ءُ تاھیر ءَ ترس ودی بوت کنت  پمیشکا درسیں وطن دوستاں یکجا ءُ یک مشت بوگ  ءُ تشدد ءِ سیاست بے سوب کنگ لوٹ اِیت ۔ نیشنل پارٹی ءِ سیمی سئے روچی گانگریس ایم پی اے ھاسٹل شال ءَ بنگیج بوتگ ۔ اولی  روچ ءِ دیوان ءَ بنجاھی کارگشاد طاھر بزنجو ءَ پارٹی ءِ کارکردگی رپورٹ پیش کرتگ ، رپورٹ ءِ سر ءَ سرجمیں دیوان ءَ تپاک کرتگ ءُ ساڑاٹگ ۔ دیوان ءَ پاکستانی سینیٹر ءُ پارٹی ءِ سروک ڈاکٹر مالک ءَ گوشتگ کہ گانگریس ءِ تہ ءَ  چَہ سندھ ءُ خیبر پختونخواہ ءَ اَتکگیں کونسلران وش اَتک  گوش آں ۔ مشکل ءُ گرانیں جاورانی تہ ءَ باکساں گوں جوانمردی ءُ نترسی ءَ بنجاھی راج کانگریس سوبمند کرتگ پہ ایشی ءَ درسیں ھنکینانی کردار ءِ سر ءَ پھر بندگ لوٹ اِیت ۔ مروچی مئے راج راھشون مولابخش دشتی مئے میان ءَ نہ اِنت بلے پہ آئی ءِ یاتگیری ءَ اے دیوان ءَ ھما شھیدانی نام ءَ کن اِیں ۔آئی ءَ گوشتگ کہ اے سدی ءِ بندات ءَ مزنیں تبدیلی میان رودرتک ءَ شھنشاھانی تاجانی کشگ اِنت چَہ تیونس ءَ بہ گر یمن ءُ مصر ھمے مَل ءِ دیمپان اَنت ۔ میان اُستمانی سرمایہ دار نوکیں شور ءُ گوں  وتی  توسیع پسندیں مراداں دنیا ءَ یونی پولر ورلڈ جوڑ کنگ ءِ نیمگ ءَ جنزگ ءَ اَنت بلے اے بوگی کارے نہ اِنت کہ دنیا ءِ تہ ءَ بیوکیں بدلی پہ مھلوک ءَ سوتمند بنت ۔اے ملک ءِ تہ ءَ مروچی ھم واک ءِ سرچمگ مھلوک نہ اِنت بلکیں اسٹبلشمنٹ ءُ دگہ ادارہ چَہ مھلوک ءَ گیشتر واکدار اَنت ۔ اد ءَ مھلوک بے وس اِنت ۔ آئی ءَ گوشتگ کہ اے ملک بازراجیں ملکے ھرچ راجے ءِ وتی زمین کیاس ، دپتری بستار ءُ سرزمین اِنت بلے نابرابری ءُ راجانی میان ءَ ھستیں دوری راجاں وتی تیاب ءُ مڈیانی سر ءَ واتکواکی نہ دیگ ءِ سبب ءَ جنجال ودی بوگ ءَ اَنت پاکستان ءَ دھشت گردی ءِ مزنیں  ھارے اَتکگ ۔ خیبر پختونخواہ ءُ بلوچستان ءَ دھشت گردی ءِ آس  دَمینگ ءُ اُستمان دوست ءُ ایمن پسندیں گل بے وار کنگ بوگ ءَ اَنت ۔ بلوچستان ءَ ریاستی جبر گیش بوتگ ، فوجی آپریشن برجاہ اِنت ورناگار کنگ ءُ آھانی دیم شرینتگیں میت ھمروچ دزکپگ ءَاَنت ۔ چَہ ریاستی  جبر ءَ پد پہ ما مستریں ترس  مئے راج پجار ئیگ اِنت ۔بلوچاں سئے مزنیں جنجال دیم ءَ اِنت اول بلوچستان ءِ بے روزگاری اِنت اے وھد ءَ بلوچستان ءِ سئے ھنکیں چَہ نیزگاری ءِ لیکارءَ جھل تر اَنت دومی ناوانندگی ءُ سیمی مذھبی انتہاپسندی اِنت ۔ دیوان ءَ ادریس بختیار ، پختونخواہ آرگنائزر بختیار باچا، وویمن سیکریٹری یاسمین لھڑی ، اسلم بلوچ ، میراں بخش ، عبید لاشاری ءَ ھم تران کرتگ ۔ وھدے کہ دیوان ءِ تہ ءَ نواب محمد خان شاھوانی ، سردار کمال خان بنگلزئی ، امام بھیل ، جان محمد بلیدی ، ڈاکٹر یاسین بلوچ ، اسلم بلیدی ، پروفیسر ریاض ءُ ڈاکٹر اسحاق بلوچ ءَ ابید دگہ مردماں ھم بھر زرتگ ۔ ھمے دیوان ءَ ڈاکٹر مالک  ءَ چَہ پارٹی ءِ چیر دستیں نودربر گل ءِ نوک گچین بوتگیں اُگدہ داراں ھم سوگند زرتگ ۔