کشمیر : تپاکیں راجانی گل گمنامیں مانشانی پول ءَ بہ کنت

کشمیر :ھندوستانی کشمیر ءِ نامداریں راھشون سید علی گیلانی ءَ گوں  تپاکیں راجانی گل ءَ دزبندی کرتگ کہ آ چَہ گوستگیں بازیں سالاں گمنامیں مانشانی بابت ءَ پاشک بوتگیں ھالانی راستی ءِ زانگ ءَ یک گچینی کمیشنے جوڑ بہ کنت ۔ علی گیلانی ءَ دوشنبے ءِ روچ ءَ گوں اھوالکاراں تران کنان ء گوشتگ کہ  ریاستی سر وزیر عمر عبداللہ ءَ اے سوج رد کرتگ کہ زرباری افریقہ ءِ وڑ ءَ کشمیر ءَ ھم ٹروتھ اینڈ ری کنسلی اِیشن کمیشن اڈ کنگ بہ بیت داں چَہ گوستگیں بیست ءُ یک سال ءِ تہ ءَ بیوکیں کوشانی چَہ سر ءَ پول کنگ بیت ۔آئی ءَ گوشتگ کہ کشمیری مھلوک چَہ گوستگیں شست ءُ چار سال اِنت جبر سگگ ءَ اَنت ۔اد ءَ ھرچ دادگاھے ھست آ پولیسانی چیر دست اِنت ءُ ھردے کہ زیردست آھانی گور ءَ رو اَنت گڑا  ھم دادرسی نہ کن اَنت اِش ۔ھمے بندبست ءِ تہ ءَ اگاں کسے گمنامیں مانشانی پول ءَ کنت گڑا دادگری بوگ ءِ چون اُوست بندگ بیت ۔ سید علی گیلانی ءَ گوشتگ کہ آ وت گوریچانی کشمیر ءِ کوچگ کچھامہ  ئیگ اِنت آ اُود ءَ مردماں گوشتگ کہ فوج مردماں کش اِیت ءُ پد ءَ  بے پجار ءَ مردماں گوشگ بیت کہ ایشاں کل بہ کن اِت ۔