شال ' گوں سرمچاراں گپ ءُ تران ءِ ھبر ریاستی ڈھنڈورے ' بی آر پی

شال [ جھگیر ] بلوچ ری پبلکن پارٹی ءِ بنجاھی ربال شیر محمد بگٹی ءَ گوشتگ کہ گوں سرمچاراں گپ ءُ تران  ءِ ھبر لھتیں مردماں وت ءَ ماں  روتاکانی تہ ءَ زندگ کنگ ءُ آجوئی لوٹوکیں گلانی میان ءَ یک دومی ءِ سر ءَ شک پاد کنگ ءَ کرتگ ۔آئی ءَ گوشتگ کہ ابید چَہ آجوئی ءَ کم دگہ ڈک ءِ سرءَ گپ ءُ تران نہ بیت ۔آئی ءَ گوشتگ کہ پہ بلوچ گلزمین ءَ شھید نواب اکبر خان ءِ پجیگ ءَ ھزارھاں بلوچاں وتی سر ندر کرتگ ءُ داں انوگ ءَ ھزارھاں بچ پہ گلزمین ءِ پھازگ ءَ ریاست ءِ شکنجہ جاھاں بند اِنت ءُ ریاستی فورسزآھانی سر ءَ انسانیت سوچیں جبر کنگ ءَ اَنت ءُ بلوچ سرمچاراں پہ وتی گلزمین ءِ پھازگ ءَ سلاہ چست کرتگ  نہ پہ  اسلام آباد ءِ راجی تک ءَ ھوار بوگ ءَ۔ گپ ءُ تران  یک بھر یا تکے ءِ وس ءِ ھبر نہ اِنت نوں سرجمیں بلوچ راج یک لشکرے جوڑ بوتگ کہ ابید چَہ آجوئی ءَ دگہ ھچ ھبر ءِ سر ءَ منینگ نہ بیت ۔ سرمچارانی سوبمندیں اُرش ءُ بلوچ راج زرمبش ءِ میان اُستمانی تَک ءَ نامداری ءَ زور گیرانی فورسز ءُ آھانی کاسگ چٹانی واب ھرام کرتگ اَنت پمیشکا آ پہ بلوچ راج ءُ جھان ءِ چمانی بندگ ءَ گپ ءُ تران ءِ ڈھنڈور کنگ ءَ اَنت ۔ بیان ءِ تہ ءَ گوشگ بوتگ کہ چَہ  بلوچ دژمن ریاست ءُ آئی ءِ کاسگ چٹانی بدیں دیم ءَ دموکا دیر اَتکگ۔ بیان ءِ تہ ءَ گوں بلوچ راج ءَ دزبندی کنگ بوتگ کہ آ بلوچ راج آجوئی ءِ ھلاپ ءَ کرتگی٘ ڈھنڈوراں گوش مہ دار اَنت ءُ وتی سرپانی تہ ءَ یکجاھی گیش بہ کن اَنت ءُ ھرچ سنگر ءَ دژمن ءِ دیم ءَ میلانک بہ بنت داں شھیدانی بیر گرگ ءُ گلزمین پھازگ بہ بیت