الجیریا: منی پِت جنگ ءَ سوب مند بیت، عائشہ قذافی

الجیریا: لیبیا ءِ پیشی رھشون کرنل قذافی ءِ جنک عائشہ قذافی ءَ شامی ٹی۔ وی ”آرائے” ءَ ٹیلیفون کنان ءَ گوشتگ کہ آئی ءِ پت یاگیانی ھلاپ ءَ جنگ ءَ زوت سوب مند بیت۔ آئی ءَ ٹیلیفون کنان ءَ گوشتگ کہ آئی ءِ پت یک ٹوھیں رھشونے، آ سلاہ ءُ بمب ءِ جوڑ کنگ ءِ مزنیں زانتکارے۔ آ وتی فوجی جوانیں راہ ءُ راھبندانی کمک ءَ دژمن ءَ پروش دنت۔ اے راستی زوت دیم ءَ کئیت کہ آ لیبیا ءِ حقیقی رھشونیں۔ لیبیائی اُلس آئی ءِ سرا پھر کنت۔ آئی ءَ لیبیا ءِ نوکیں عبوری کونسل ءِ سرا ایراد گِران ءَ گوشتگ کہ اے قوم پروشانی یک ٹولی یے، امریکا ءُ آ دگہ زوراکانی کمک ءَ اقتدار ءَ اَتکگ، زوت وتی عاقبت ءَ گوں دوچار بیت۔ عائشہ قذافی ءَ گوشتگ کہ من ءُ منی مات ءُ دو برات بیست نوہ اگست ءَ پہ پناہ ءِ ھاترا الجیریا ءَ سر بیتگیں۔ منی پِت دُژمن ءِ مقابلہ کنگ ءَ لیبیا ءَ جَل اِتگ۔