پندلاں ابید جھد سوبمند بوتگ ' بی این ایم ءِ بنجاھی باسکانی دیوان ءَ چیئرمین خلیل ءِ تران

شال : بلوچ نیشنل موومنٹ ءِ چیئر مین خلیل بلوچ ءَ گوشتگ کہ جھانی سامراجی پندلاں ابید ھم بلوچ زرمبش وتی بستار ءِ منینگ ءَ سوبمند بوتگ ۔بی این ایم گوں دگہ آزادیں پسندیں پارٹیانی ھمراھی ءَ دژمن ءِ دیم ءَ چوش کوہ ءَ میلانک اِنت ءُ دژمن ءَ ذھنی ءُ پگری تک ءَ پروش دیگ ءَ سوبمند بوتگ ءُ مروچی سرجمیں دنیا  اے ھبر ءِ منگ ءَ لاچار اِنت کہ بلوچ راج اے دمگ ءِ یک مھکمیں ھاٹیگے ءِ بستار ءَ وتی آجوئی ءِ جنگ ءَ کنگ ءَ اِنت ۔ اے ھیال آئی ءَ بی این ایم ءِ بنجاھی باسکانی دیوان ءِ تہ ءَ بھر زرتگیں باسک ءَ گوں تران کنان ءَ گوشتگ اَنت ۔ دیوان ءِ تہ ءَ پارٹی ءِ کار ، دمگ ءُ میان اُستمانی جاور ءُ دیم ءِ شوربندی ءِ سر ءَ گپ جنگ بوتگ ۔ دنیا ءِ تہ ءَ میان اُستمانی بدلی ، نوکیں سرپ بندی ءُ میان رودرتک ءِ پجیگ ءَ گیشترملکاں چست بیوکیں لس زرمبش ، اے دمگ ءِ تہ ءَ امریکہ ءِ وتی پالیسیاںی سر ءَ شرگداری ءُ امریکہ ءِ پاکستان ءِ مالی ءُ پہ جنگی گزراں داتگیں کمک ءِ سر ءَ بندش جنگ ءِ ناٹک ، چین ءِ گیش بوتگیں اسرمندی رنگیں بنگپانی پد ءَ بلوچ راج ءِ آجوئی ءِ درگت ءَ کرتگیں شوربندی ءُ باندات ءِ جاورانی سر ءَ چار بچار کنگ بوتگ ۔ دیوان ءِ تہ ءَ اے ھبر ءِ سر ءَ تاھیر درشانگ بوتگ کہ جھانی واکدارنی وت ما وت دیم پہ دیمی ءُ دمگ ءِ تہ ءَ دزمانجنیانی گیش بوگ ءَ پد ھم بلوچ گوں وتی جند ءِ ھاٹیگ ءَ راجدوستی ءِ راھبندانی سرءَ روان راج آجوئی زرمبش ءَ چَہ اولی اسٹیج ءَ دومی اسٹیج ءَ برگ ءَ سوبین بوتگ ۔ راج باھندی پاھاراں برجاہ داران راجی جنگانی راھبندانی سر ءَ زرمبش ءِ آجوئی ءِ رژناھیں منزل ءَ سر کنگ پد تاھیر بئے اِیں ۔ دنیا ءَ دیمپانیں جنجالاں مئے اے ھبر راست کرتگ کہ 1947ءَ پہ آمریں سامراج ءِ گزرانی نگھوانی ءَ جوڑ بوتگیں ریاست ءِ سرکردگی ءَ انتہا پسند دمگ ءَ انسانی مزن  جیڑھانی ودی کنگ ءِ ذمہ وار اَنت ۔اے جاوراں  زرمبش ءِ یک گشادکاریں بھرے ءِ بستار ءَ بی این ایم ءِ راھشون ءُ جھدکارانی سر ءَ گرانیں ذمہ واری اَنت ۔ بی این ایم ءِ نیمگ ءَ شنگ بوتگیں بیان ءَ ھمگرنچ اِنت کہ دیوان ءَ لھتیں ارزشمندیں شوربندگ بوتگ کہ آھانی دیر رسیں آسر درکپ اِیت ۔ خلیل بلوچ ءَ دیوان ءِ ھلاسی ءَ پیش وتی گپانی تہ ءَ گوشتگ کہ اے جوانیں ھبرے کہ پارٹی راھشون ءُ جھدکار وتی ذات ءَ سرگوز کنگ ءُ گوں شاھگانیں وژنے ءَ پہ مزنیں لوٹانی پیلوکنگ ءَ گوں سر نہ پھریزی ءَ جھد کنگ ءَ اَنت ۔آشوبی جھد ءِ تہ ءَ آشوبی روش ءُ کردار سرین ءِ ھڈ ءِ بستار ءَ دار اَنت ءُ اے کار پارٹی ءِ تہ ءَ گوں تیزی ءَ ردوم زورگ ءَ اَنت ۔ دژمن وتی ھاٹیگ ءُ توامیں جبراکیاں ابید ھم  بی این ایم ءِ گوں جھد ءَ مھکمیں ھمگرنچی ءِ سندگ ءَ سوبین نہ بوتگ ۔ پارٹی ءِ چیر مین غلام محمد بلوچ ، لالہ منیر ءُ شیر محمد ءِ شھادت ءَ پد دژمن ءَ پارٹی ءِ بازیں راھشون شھید کرتگ ، ڈاکٹر دین محمد بلوچ ، غفور بلوچ ، صمد بلوچ ، بابابوھیر بلوچ ءُ جاوید نصیر ءِ پجیگ ءَ دگہ بازیں راھشون ءُ باسک آوار جنگ بوتگ کہ اے وھدی دژمن ءِ شکنجہ جاھاں بدتریں شکنجہ برداشت کنگ ءَ اَنت ۔ بلوچ اے دمگ ءِ یک مھکمیں واکے ءِ بستار ءَ جنگ کنگ ءَ اِنت بلوچ وتی گیدی جنگی رواجاں نوکیں دور ءِ لوٹانی پد ءَ نوک کنان نہ ایوک راجی ءُ آشوبی جنگاں جوانی ءَ چارگ ءُ ٹپاسگ ءَ اِنت ، ءُ جھد ءَ یک نوکیں دورشمے داتگ ئِے کہ نہ ایوک بلوچ ءِ ھستی ءِ پھریزگ ءَ سوتمند اِنت بلکیں بلوچ ءِ گستائیں جنگی دودمان ھم یک رندگیری کرزیں درورے جوڑ بوتگ ءُ یک انچیں رژناھی یے کہ دنیا ءِ گیشتر چیر دستیں راج ءُ آشوبی زرمبش ایشی ءَ شرپ ءُ مڑاہ دیگ ءَ اَنت۔ بی این ایم ءِ جھدکارانی ذمہ واری اِنت کہ وتی راجی ذمواں پیلو بہ کن اَنت ءُ ندریگانی درچ ءَ برجاہ داران وتی ھون ءَ پیش کنان بہ کن اَنت ۔ دیوان ءِ تہ ءَ پارٹی ءِ بنجاھی مجلس ءِ باسک ساجد بلوچ ءُ آصف بلوچ ءِ پجیگ ءَ دگہ شھیداں سھریں سلام پیش کنگ ءُ گوشگ بوتگ کہ آھاں گوں وتی کسان سالیں بالاد ءَ چَہ انسانیت ءَ دریں درسیں شکنجہ سگ اِتگ اَنت ءُ پہ وتی سرزمین ءَ جان ندر کرتگ نہ ایوک ءَ ابدمان بوتگ  اَنت بلکیں راج آجوئی ءِ جھد اِش ھم سرسبز کرتگ۔