خضدار ' ڈگری کالج ءِ پرنسپل پیراسائٹ ءُ کالج گھوسٹ جوڑ بوتگ

خضدار [ ھالچار ] ڈگری کالج خضدار چَہ گوستگیں سئے ھپتگ ءَ بند اِنت ءُ وانگ زانگ مھتل اِنت ۔ ھنکین ءِ چارگزار ایوک سیل کنگ ءَ اَنت ۔ کالج ءِ برباد کنوک پرنسپل اِنت پہ ادارہ ءِ پھازگ ءَ زوت چَہ خضدار ءَ  تبادلہ کنگ بہ بیت ۔اے ھیال بلوچستان پروفیسرز اینڈ لیکچرار ایسوسی ایشن ڈگری کالج ءِ کماش علی اکبر ساسولی ، کمک کماش کرم خان محمد حسنی ، فنانس سیکریٹری سعید احمد لانگو ، پروفیسر محمد اسحاق باجوئی ، پروفیسر عبدالرزاق زھری ، پروفیسر عبدالحکیم رونجا ءُ دگراں وتی یک بیانے ءِ تہ ءَ گوشتگ ۔آھاں گوشتگ کہ پرنسپل کالج ءَ یک پراسائٹے ءِ رنگ ءَ مِچگ ءَ اِنت  ۔ وانگ ءِ باندات ءَ کالج گھوسٹ جوڑ بوتگ ۔ کالج ءَ بھتہ واری ءُ لٹ پل بوگ ءَ اِنت ۔ پہ کالج ھاسٹل ءُ بیچلر لاج ءَ بلوچستان سرکار ءَ شست لکھ روپیہ  داتگ بلے اے بازیں زر زوال بوگ ءَ اَنت ۔ پرنسپل ءِ سکین ءَ بازیں پروفیسرانی سر ءَ کیس ھم جنگ بوتگ ۔کالج ءِ بند کنگ ءِ سبب ءَ یک نیمگے وانگ ءُ زانگ ءِ  درچ اُوشتاتگ ءُ دومی نیگ ءَ نودربرانی ارزشمندیں سال زوال بوگ ءَ اَنت۔