سی۔ آئی۔ اے ءِ ھم بازیں ٹیروریسٹ گلانی گُما سیادی استاں۔ حنا جیلانی کھر

واشنگٹن: پاکستان ءِ دری کارانی سیکرٹری حنا جیلانی کھر ءَ گوشتگ کہ سی۔ آئی۔ اے ءِ ھم بازیں ٹیروریسٹ گلانی گُما سیادی استاں۔ امریکا مارا چکاس مہ گیپت۔ اگاں بُھتامانی لڑ بند نہ بیت تا گُڑا پاکستان ءِ گورا ھم بازیں آپشن آنی کارمرز کنگ ءِ حق اَستاں۔ پاکستان ایوک نہ ایں سرجمیں دُنیا مئے ھمراھیں۔ واشنگٹن ءَ عربی ٹی وی ءَ آئی ءَ ھال کنان ءَ گوشتگ کہ امریکا ءَ دنیگہ مارا ھچ ثبوت نہ داتگ۔ پاکستان ءَ ھما دھشت گرد گل ءَ کہ کمک کنگ ءِ بُھتام جنگ بیئگیں آ وا امریکا ءِ وتی جوڈ کُتگیں گلے۔ آئی ءَ گوشتگ اگاں ما دھشت گرد گلانی گُم ءَ سیادی ءِ گپ ءَ بہ کنیں گُڑا امریکا ءِ ھوں دُنیا ءِ بازیں دھشت گرد گلانی گُم ءَ سیادی اَستاں۔ اے نیٹ ورک ءِ امریکا مارا ایشی ءَ گُم ءَ ھواری ءِ بُھتام ءَ جنگیں، اے وا امریکا ءِ وتی رودینتگیں درچکے۔ او ما اے ھم گوشت کنیں حقانی نیٹ ورک سی۔ آئی۔ اے جوڈ کُتگیں گلے۔ حنا جیلانی ءَ گوشتگ اتحادی ءُ دوست رسانکدر ءِ وسیلہ ءَ بُھتام نہ جناں، رسانکدر ءِ وسیلہ ءَ بُھتام جنگ پاکستان ءِ پالیسی نہ ایں۔ ایشی ءَ مئے نِزوری سرپد مہ بئے، آئی ءَ گوشتگ امریکا مارا برداشت ءَ چہ گیش چکاس مہ گیپت۔ اگاں بُھتامانی لڑ بند نہ بیت تا گُڑا ما ھمے سرپد بئیں کہ اے امریکا ءِ پالیسی یے۔ گُڑا مارا ھم وتی پیسلہ کنگ ءِ حق اَستیں۔ آئی ءَ گوشتگ چوشیں بیاناں چہ پچیں دروازگ بند بنت۔ آئی ءَ گوشتگ پاکستان ءَ دھشت گردی ءِ ھلاپ ءَ جنگ ءَ اُلسی پلہ مرزی گونیں بلے امریکا گوں چوشیں بیاناں اُلسی پلہ مرزی ءَ ھلاس کنت۔( نو دُنیا گِندگیں کہ امریکا ءِ ءُ پاکستان ءِ ٹگی ءُ ٹوری ھتماں، نو اے خدایا گپتگاں وتی چیریں رازاں وت پدر کنگایاں۔ بلوچاں گوشتگ دُزے مات داں چِنکہ پیگ پچیت، سامراج ءِ دروگ ھلاس بیتگاں، سامراجی دلار ءُامریکی مکاریں پیشی وزیر خارجہ جان فاسٹر ڈلس ءِ پیدا کُتگیں مذھبی بُنیاد پرستی ءُ مُلائیت ءِ دور ھم کُٹ اِتگ.