بنگلہ دیش ءَ جماعت اسلامی ءَ جَھ جتگ ' سئے سد شورشی دزگیر

ڈھاکہ : بنگلہ دیش پولیس ءَ چَہ سرجمیں ملک ءَ بیوکیں پرشت ءُ پروشیں زھر شانی ءَ پد جماعت اسلامی ءِ سئے سد باسک دزگیر کرتگ ۔زھرشانی کنوک لوٹ کنگ ءَ اَنت کہ سرکار آھانی ھما لیڈراں یلہ بہ دنت کہ آ نوزدہ سد ءُ ھپتاد ءُ یک ءَ گوں پاکستان ءَ بوتگیں آزادی ءِ جنگ ءِ تہ ءَ پاکستانی سپاھیگاں ھور بوتگ اَنت ءُ جنگی جرم اِش کرتگ ۔ اے رد ءَ بنگلہ دیش نیشنلسٹ پارٹی ءَ ھم جماعت اسلامی ءِ پلہ مرزی کنگ ءَ اِنت ۔ بی این پی ءِ یک اُگد ہ دارے ءَ گوشتگ کہ آھانی زھرشانی ءِ یک مولے چَہ سرکار ءِ نیمگ ءَ تیل ءِ نھادانی سر ءَ نوزدہ درسد گیشی اِنت ھم ۔اے درگت ءَ بیست ءُ دو ستمبر ءَ سرجمیں ملک ءَ دربندی ءُ پرگ بندی ءِ جار جنگ بوتگ ۔ زانگ بہ بیت کہ بنگلہ دیش ءِ ایمنی ءُ کراچی ءِ بے ایمنی ءِ سبب ءَ ھمے زوت ءَ بنگلہ دیش پہ سرمایہ دار یک جوانیں جاھے جوڑ بوتگ ءُ چَہ پاکستان ءَ بازیں مردماں وتی زر کشتگ ءُ پہ سرمایہ کاری ءَ بنگلہ دیش ءَ برتگ اَنت ۔ اے ھالانی تہ ءَ بنگلہ دیش ءَ چَہ ھما مردمانی نیمگ ءَ چست بیوکیں شورش کہ آ پاکستان ءِ منوک اَنت ایشی ءِ پشت ءَ پاکستان ءِ دست بوگ ءِ  گمان ودی کنگ ءَ اَنت ۔