جنیوا: ليبيا ءَ چیریں "قَبر" دز كپتگ،ریڈ کراس

جنیوا (هال) ميان اُستمانى كمک كارى گل "ریڈ کراس کمیٹی" ءِ رِدا  ليبيا ءَ آئى ءِ باسكاں هَر هفتگ اِجتملئى چیریں "قَبر" دز كپگ ءَ اَنت، "ریڈ کراس کمیٹی" ءِ رِدا آئى ءِ كارِندهاں طرابلس ءِ كَش ءُ گوراں ١٢٥ مَردمانى چیریں قَبر درگیتکگ اَنت، ءُ دوباره كَل كُتگ اَنت، ریڈ کراس ءِ شنگ كُتگیں بيانے ءِ رِدا ليبيا ءَ چیریں "قَبرانى" دز كپگ ءَ چہ هما مَردمانى جُستانى پسّہ دَز كپتگ کہ آهانى كَس ءُ مَردم ليبيا ءِ جنگ ءُ چوپ  ءِ وهد ءَ گارءُ  بیگواه كنگ بیتگ اَنت ، ریڈ کراس ءَ چہ ليبيا ءِ سركار ءُ اُلس ءَ دزبندى كُتگ كہ آ   قبرانى كُلونڈگ ءُ لاشانى در كنگ ءِ جُهد ءَ مہ كناں، چیاکہ اے وڑا لاشانى پجار کنگ مُشكل بيت، ریڈ کراس ءَ گوشتگ آئى ءِ زانوگر زوت ءَ چہ زوت ليبيا ءَ سر بنت، ءُ لاشانى پجّار ءِ جُهد ءَ كن اَنت.