جنیوا؛ من سلاہ بندیں جُھد ءِ رھشونی ءَ کنگ ءَ نیاں، البت منی راج ءِ ورناہ بلوچستانءِ آزادی ءِ ھاترا سلاہ بندیں جنگاياں۔ نواب براھمدگ بگٹی

جنیوا:  نواب براھمدگ بگٹی  ءَ  گوشتگ  من ءَ گوں سلاہ بندیں   جُھد ءَ ھچ سیادی نیست۔ سوئٹزر لینڈ ءَ سیاسی پناہ ءِ واستہ اتکگاں۔آئی ءَ گوشتگ پارٹی ءِ سربراھی ءَ چہ دزکش بیئگءَ تیاراں، من ءَ گون سلاہ بندیں جُھد ءَ سیادی نیست۔ بلے منی دیھ ءِ ورناہ آزادی ءِ جنگ ءَ کنگایاں۔ سوئس ھالتاک ءِ ردا نواب براھمدگ یک علیحدگی دوستیں رھشونے، پاکستان آئی ءِ گوشگ ءِ رندائین، اے درگت ءَ آئی ءَ سوئٹزرلینڈ ءَ سیاسی پناہ ءِ دزبندی کُتگ۔ پاکستان ءِ ردا آ یک دھشت گردی ،پاکستان ءِ پروشگ ءِ جنگائیں۔ ھالتاک ءَ آئی ءَ تران کنان ءَ گوشتگ کہ پاکستان من ءَ بار بار گوشگ ءِ بیھار دیگیں۔ اے جاوراں بلوچستان ءَ رؤگ منی جان ءِ واستہ خطرہ ایں۔ پمیشا من سیاسی پناہ ءِ دزبندی کُتگ۔ آئی ءَ گوشتگ بلوچستان مال ءُ مڈیاں چہ چکاریں ڈیھے۔ آئی ءَ ھالتاک ءَ تران کنان ءَ گوشتگ کہ ماں بلوچستان ءَ پاکستان ءِ ظلم ءُ زوراکیاں مارا سک پریشان کُتگ، بلوچانی آوار جنگ ءُ کُشگ ءُ گار کنگ پاکستانی چیریں دستانی ھر روچیگیں کاری جوڈ بیتگ۔ آئی ءَ گوشتگ پارٹی ءِ ھزاراں باسک ءُ دگہ بازیں بلوچ پاکستانی چیریں دستاں آوار جتگ ءُ کُشتگاں۔ اے درگت ءَ ایمنسٹی انٹر نیشنل ءُ دگہ بازیں انسانی حقانی گلاں دلپدردی درشان ھم کُتگ ءُ اے نشوندھی ھم کُتگ کہ اے کاراں پاکستانی ادارہ کنگایاں۔ آئی ءَ گوشتگ منی پارٹی باسک ءُ سیاد ءُ کساں چہ پاکستانی ادارھانی نیمگ ءَ قتل ءِ بیھار دیگ بیئگیں۔ آئی ءَ گوشتگ کہ من سلاہ بندیں جُھد ءِ رھشونی ءَ کنگ ءَ نیاں، البت منی راج ءِ ورناہ بلوچستانءِ آزادی ءِ ھاترا سلاہ بندیں جنگائيں۔ آئی ءَ گوشتگ منی گوں یو۔ این۔ او ءِ پیشی سیکرٹری جنرل کوفی عنان ءِ سوئس سرکار ءِ گُم ءَ رابطہ نہ بیتگ۔ بلے ھالتاک ءِ ردا سوئس سرکار ءِ گوشگ اِنت کہ آھاں گوں بلوچ رھشون ءَ ھما دوئیں سوئس  شھریانی درگت ءَ رابطہ کُتگ کہ بلوچستان ءَ آوار جنگ بیتگاں، او آوار جنگ ءِ ذمہ واری تحریک طالبان ءَ زُرتگ۔