اگاں ”اضافیت ءِ لیکہ رد بوت، تا گُڑا دُنیا چی کنت؟

یورپی  پٹ  ءَ  پولی کارگس   ”سرن” ءِ   یک     شنگ   کُتگیں ھالے ءِ  ردا ”ایٹم” ءِ بُنکی ذرہ ”نیوٹرینو”  رُژنے رپتار ءَ   چہ  تیز تِر  سفر کُت   کنت۔  بِزاں آئن اسٹائن ءِ اضافیت ءِ  لیکہ  رد بیت  کنت۔  اے ردا  یک  پٹ ءُ پولی تجربگے ءَ گوشگ بیتگ کہ سوئیٹزرلینڈ ءِ شھر جنیوا ءَ چہ چارسد پنجاہ کیلومیٹر دور اطالیہ ءِ شھر گران ساسو ءِ پٹ ءُ پولی کارگس ءَ رُژنے مقابلہ ءَ دیم داتگیں زرہ آں چہ ھمے سِھرا بیتگ، کہ زرہ چہ رُژن ءِ کساس ءَ شست نینو سکینڈانی تیزی ءَ پیش سفر کُت کن اَنت۔ بلے اے پٹ ءُ پول ءِ راستی سرجم ءَ منگ نہ بیتگ۔  سرن ءِ نیمگ ءَ شنگ بیتگیں رپورٹے ردا  اگاں ایٹمی زرہ آنی رُژن ءِ رپتار ءَ  چہ تیزتر سفر کنگ ءِ  پٹ پول ءِ راستی منگ بہ بیت تا گُڈا یک نیمگے آئن اسٹائن ءِ اضافیت ءِ لیکہ ءِ سرا ھم یک رندی  پدا چار ءُ بچار کنگ کپیت، دومی نیمگا رُژن ءِ رپتار ءَ ھر شئے ءِ سفر کنگ المی بیت کنت۔ زانتکاری ءِ گوشگ اِنت کہ  اگاں پٹ ءُ پول راست در بئیت تا  گُڑا گوست ( ماضى) ءِ ھمراھی ءَ   کلوہ دیم دیگ ھم ھژدری بیت کنت۔  نامداریں فلکی زانتکار  مارٹن ریز ءَ گوشتگ کہ بلاھیں دعوا آنی راستی ءِ منارینگ ءِھاترا بلاھیں ثبوت ءِ دیگ المی اِنت۔ ھنچو پہ دیم نہ اِنت۔ یورپی پٹ ءُ پولی کارگس سرن  کائنات ءِ جوڈ بیئگ ءِ  راز ءِ در گیجگ ءِ سرا ھم پٹ ءُ پول  کنگیں۔ اے درگت ءَ ھم ایٹمی زرہ آنی چہ رُژن ءِ  مقابلہ ءَ  تیزتر سفر کنگ ءِ نشوندھی ھم بیتگ۔  فزکس ءِ زانتکار آئن اسٹائن ءَ وتی لیکہ اضافیت ءَ ھمے راستی دیم ءَ آؤرتگ  کہ رُژن اے دگہ  کُلیں شئے آں  چہ تیزتر سفر کُت کنت۔  نوزدہ سد ءُ شش ءَ آئی ءَ ھمے لیکہ داتگ کہ  دُنیا ءِ تھا رُژن بُنکی شئے اِنت  کہ آئی ءِ تیزی ءَ دگہ ھچ شئے سفر کُت نہ کنت۔  وھدیکہ لیکہ ءِ دیگ ءَ لھتے وھدا رند  آآکسفورڈ ءَ لکچر دیگا بیت ، گُڑا یکے ءَ ھال داتگ کہ تئی لیکہ سائنسداناں راست من اِتگ تا آئی ءَ درائینتگ کہ منی خُدا من ءَ دُروگ بند نہ کنت، نیوٹرینو ایٹمی زرہ آنی   سرا پٹ ءُ پول کنوکیں امریکی سائنسدان  جینی تھوماس ءِ ردا اگاں کساس کُتگیں شست   نینو سکینڈانی فرق راست بہ بیت۔  گڑا فزکس ءِ دُنیا ءَ کسانیں وھدے ءَ مزنیں بدلی یے کئیت۔   (دگہ بدلی ءَ نہ زاناں ، بلے پہ انسان ءِ کُشگ ءُ گار کنگ ءَ زاناں دگہ نوکیں بمبے اڈ کنگ ءَ دِلمانگاں)۔