واشنگٹن : ھندوستان پیش کپتگ ءُ فلسطین ءِ پلہ مرزی ءِ جار ئِے جتگ

واشنگٹن : فلسطین ءِ پلہ مرزی کنگ ءَ ھندوستان پیش کپتگ ءُ اے درگت ءَ ھندوستان ءِ سر وزیر منموھن سنگھ ءَ پہ تپاکیں راجانی گل ءَ فلسطین ءِ باسکی ءِ پلہ مرزی کنگ ءِ جار جتگ ۔ اے درگت ءَ سر وزیر ءَ فلسطین ءِ کماش محمود عباس ءَ یک نمدی نوشتگ ، آئی ءِ تہ ءَ گوشگ بوتگ کہ ھندوستان ءَ مدام فلسطین ءِ مھلوک ءِ جائزیں مولانی پلہ مرزی کرتگ ، من ترا چَہ ھندوستان ءِ نیمگ ءَ باور کنائین آں کہ ھندوستان تپاکیں گل ءِ دیوان ءَ فلسطین ءِ باسکی ءِ پلہ مرزی کنت ۔ تپاکیں راجانی گل ءِ تہ ءَ ھندوستان ءِ مدامگیں جھگیر پردیب سنگھ ءَ اھوالکار ءَ ھمے نمدی ونتگ ءُ گوشدارینتگ ۔ چَہ ایشی ءَ پیش فلسطین ءِ کماش  من موھن سنگھ ءَ نمدی نوشتگ کہ آ تپاکیں راجانی گل ءِ باسک بوگ ءِ جھد کنگ ءَ اِنت ۔ وتی نمدی ءِ تہ ءَ ھندوستانی سروزیر ءَ نوشتگ کہ فلسطین ءُ ھندوستان ءِ میان ءَ دپتری سیادی ھست اَنت ءُ ھندوستان ءَ مدام یک وتواک ، آزاد ءُ مھکمیں فلسطینی ریاست ءِ پلہ مرزی کرتگ کہ آئی ءِ بنجاھی شھر رودرتکی یروشلم ءَ بہ بیت ، ھما کہ وتی گیش اِتگیں سیمسرانی تہ ءَ گوں ازرائیل ءَ ایمنی ءَ گوں زندگی بہ کنت ۔ سر وزیر من موھن سنگھ اےوھدی پہ تپاکیں راجانی گل ءِ دیوان ءَ بھر زورگ ءَ واشنگٹن ءَ اِنت ۔ فلسطین ءِ کماش پہ باسکی ءَ آدینگ ءِ روچ ءَ تپاکیں راجانی گل ءِ کار گشاد ءَ دزبندی تا ک ءَ پیش کنت ۔ محمود عباسی ءَ چَہ اے کار ءِ دارگ ءَ سفارتی سرگرمی ھم گوں شدت ءَبرجاہ اَنت ءُ ازرائیل ءُ امریکہ  ءَ گوں فلسطین ءَ گپ ءُ تران یک رندے پد ءَ بنا کنگ ءِ دزبندی کرتگ ۔ ازرائیل ءَ اے جھد ءِ سر ءَ سک ایراد گیپتگ ءُ ایشی ءِ ھلاپ اِنت وھدے کہ امریکہ ءَ تچک کرتگ کہ آ باسکی ءِ دزبندی ءِ  رد کنگ ءَ وتی ویٹَو واک ءَ کاربند اِیت ، ویٹو ھما واک ءَ گوش اَنت کہ تپاکیں راجانی گل ءِ تہ ءَ لھتیں میان اُستمانی واکداریں ملکاں ھست کہ اگاں سرجمیں ملک یک گپے ءِ سر ءَ تپاک بوت اَنت ، آ ئِے مہ من  اِیت  آ گپ ءُ راہ ءِ سر ءَ گامگیج زورگ نہ بیت چَہ امریکہ ءِ نیمگ ءَ جار جنگ ءُ  بیھار دیگ ءَ پد اے ھبر پدر بوتگ کہ تپاکیں راجانی گل ءِ تہ ءَ فسلطین ءِ باسک بوگ چوش ارزانیں گپے نہ اِنت بلکیں داں امریکہ مہ لوٹ اِیت اے بِھ بوت نہ کنت البت ھندوستان رنگیں ملکانی فلسطین ءِ پلہ مرزی کنگ ءَ آزاد ءُ وتکواکیں فلسطین ءِ جھد سک باز دیم ءَ اَتکگ ، اگاں فلسطین ءِ پلہ مرزانی کساس گیش بوت گڑا پہ امریکہ ءَ ماں سیاسی پڑ ءَ وتی وِیٹو ءِ کارمرد کنگ گران ءَ کپ اِیت بلے امریکہ ءِ دپتر ھمے گوش اِیت کہ پہ ازرائیل ءَ امریکہ ھچ رنگیں گرانیں نھر دیگ ءَ چک ءُ پد نہ بوتگ۔