مستونگ : پہ زیارت ءَ ایران ءَ روکیں شیعانی بس ءِ سر ءَ اُرشءَ بیست ءُ شش مردم بیران بوتگ

مستونگ : چَہ شیعہ زائرینانی بس ءِ سر ءَ تیرگواری ءَ بیست ءُ شش مردم بیران ءُ بازینے ٹپی بوتگ ۔ اے بس زائرین ءَ دیم پہ ایران ءَ برگ ءَ بوتگ کہ بیگاہ ءِ ادار ءَ گنج ڈوری ءِ گور ءَ پجارگ نہ بوتگیں مردماں بس ءِ سر ءَ تیرگواری بنا کرتگ ۔ بس ءِ سر ءَ چَہ چاریں نیمگ ءَ تیر گواری کنگ بوتگ ءُ چَہ ایشی ءَ پد آ بس ءِ تہ ءَ پترتگ اَنت ۔ سلاہ بنداں ایمبولنس ءِ سر ءَ ھم تیرگواری کرتگ چَہ ایشی ءَ سئے مردم بیران بوتگ۔ یک سرکاری واکداراں اے رد ءَ ھچ  میار  وتی سر ءَ نہ زرتگ ۔  بلوچستان ءِ تھی کارانی کارگشاد نصیب اللہ نازئی ءَ گوشتگ کہ آھاں اے زائرینانی ایران ءِ نیمگ ءَ روگ ءِ درگت ھچ سرپدی نہ بوتگ بلے اے ھبر ھچ باوری ھبر ے  نہ بیت کہ پنجاہ مردم گوں یک بسے ءَ ریاستی سیمسری سرگوز بہ کن اَنت ءُ سرکاری واکداراے درگت ءَ ھچ سرپد مہ بنت ۔اے درگت ءَ بس ءِ ڈرائیور خوشحال خان ءَ گوشتگ کہ سلاہ بندیں مردم ھشت بوتگ اَنت مردمانی کشگ ءَ پد شال ءِ نیمگ ءَ شتگ اَنت ۔ آھاں پیسر ءَ گوں وتی پک اَپ ءَ گاڑی داشتگ آھاں کلاشنکوف ءُ دگہ مزنیں سلاہ گون بوتگ ۔ آھاں ءَ چَہ بس ءَ مردم ایر گیپتگ اَنت ءُ من ھمے میان ءَ چَہ اُود ءَ تتکگ آں وھد ے کہ بیرہ کرتگ داں آ وھد ءَ بازیں مردم مرتگ ءُ لھتیں ٹپی بوتگ ۔ سیکورٹی ءِ کارندہ چَہ اے کارپد ءَ یک ءُ نیم کلاک ءَ پد سر بوتگ اَنت ءُ چَہ آئی ءَ پد مدگار اَتکگ اَنت ، آھاں ٹپی ءُ مرتگیں اسپتال ءَ برتگ اَنت ۔ بس ءَ کساس پنجاہ مردم سوار بوتگ پولیس ءِ  گوشگ اِنت کہ مرتگیں مردمانی کساس گیشتر بوت کنت ۔