اسلام آباد ' پاکستان ءِ مزن داد گاہ ءِ داد رس ءَ ھم من اِتگ کہ بلوچستان ءَ زور گار کرتگیں مردمانی کساس گیش بیان اِنت

اسلام آباد [ جھگیر ] پاکستان ءِ مزن داد گاہ ءِ دادرس چیف جسٹس افتخار محمد چوہدری ءَ گوشتگ کہ بلوچستان  ءَ پہ زور گار کرتگیں مردمانی کساس روچ پہ روچ گیش بیان اِنت وھدے کہ چَہ ابید داد گاہ ءِ پرمان ءُ راھبند ءَ کشگ ءُ میتانی شرینگ ءُ چیلنیگ ءِ الزام ھم جنگ بوگ ءَ اَنت ۔ اے ھبر آئی ءَ سپریم کورٹ بار ایسوسی ایشن ءِ چیر دستی ءَ بیوکیں جوڈیشل کانفرنس ءَ گوں تران ءَ گوشتگ ۔آئی ءَ گوشتگ کہ چَہ مزن دادگاہ ءِ نیمگ ءَ دلگوش دیگ ءِ سبب ءَ بازیں بیگواھیں مردم درکپتگ بلے اے درگت ءَ دنیگت جوانیں راھبند ٹھینگ نہ بوتگ ۔ چیف جسٹس افتخار محمد چوہدری ءَ گوشتگ کہ اے سرکار ءِ بنچکی ذمہ واری اِنت کہ آ پہ اانسانی حقانی پاسداری ءَ جوانیں راھبند اَڈ بہ کنت داں چاگرد ءَ ایمنی بہ بیت ۔ چیف جسٹس افتخار محمد چوہدری وتی تران ءِ تہ ءَ گوشتگ کہ اے ھبر ءَ شکے نسیت کہ دادگاہ شھریانی حقانی پھریزوک اِنت بلے راھبند جوڑ کنوکیں ادارھانی ھم اے کار اِنت کہ آ کوھن بوتگیں راھبنداں ھلاس بہ کن اَنت ءُ انچیں راھبند جوڑ بہ کن اَنت کہ چَہ آھاں انسانی حقانی لگتمالی دارگ بہ بیت ۔چیف جسٹس افتخار محمد چوہدری ءَ گوشتگ کہ داد گاہ ءِ اے کردار نہ اِنت کہ آ دگہ ریاستی ادارھاں ایر بہ جنت بلکیں دادگاہ ءَ گوں ریاستی ادارھانی ھمکاری کنگی اِنت داں انسانی حق ءُ شھریانی آزادی  شریں وڑےءَ پھازگ بہ بنت ۔اے سئے روچی  کانفرنس ءِ تہ ءَ سری لنکا ءُ بنگلہ دیش ءِ پجیگ ءَ دگہ ملکانی وکیل بھر زورگ ءَ اَنت