حب ' بی این ایم ءِ دو باسک پاکی ایجنسیاں آوار جتگ

حب [ جھگیر ] بلوچ نیشنل موومنٹ ءِ دو باسک چَہ حب ءَ آوار جنگ بوتگ ۔ مارا رستگیں ھالانی رد ءَ بی این ایم ءِ  بنجاھی فنانس سیکریٹری صمد تگرانی چَہ حب ءَ پاکستانی ایجنسی ءِ کارندھاں آوار جتگ ۔ صمد ھما وھد ءَ آوار جنگ بوتگ کہ   آ گوستگیں شنبے ءِ شپ ءِ نو بج ءَ گوں وتی سنگتاں بشنا ھوٹل  ءَ نندوک بوتگ ۔ چَہ ایشی ءَ ابید روتاک توار ءِ گوستگیں شونکار ءُ بی این ایم ءِ باسک جاوید نصیر رند ءِ چَہ پاکستانی ایجنسیانی نیمگ ءَ آوار جنگ ءِ  ھم ھال اِنت ۔ صمد تگرانی بلوچ نیشنل موومنٹ ءِ کوھن تریں باسکاں یکے زانگ بیت ۔ جاوید نصیر چَہ بی این ایم ءِ سیاست ءِ بنداتی روچاں گوں توار ءَ ھمگرنچ بوگ ءِ سبب ءَ گیشتر سیاسی چست ءُ ایرانی تہ ءَ ھوار نہ بوتگ ءُ  مالی نہ گیگیانی سبب ءَ چَہ روتاک توار ءَ  ھم دزکش بوتگ ءُ وتی  کاراں دزگٹ اَت۔ جاوید نصیر ءُ صمد رنگیں پرا یمن ، سیاسی ءُ دگہ پڑءَ بے آزاریں مردمانی چَہ پاکستانی ایجنسیاں دست ءَ آوار جنگ ءَ پد اے ھبر سما کنگ بوگ ءَ اِنت کہ پاکستانی ایجنسیاں پہ بلوچانی چکچین کنگ ءَ لانک بستگ ءُ ھچ چوشیں بلوچے ءَ پہ زندگ بوگ ءَ نہ ھِل اَنت کہ آ گوں راجدوستیں گلانی سیادی دار اِیت یا زمانگے ھمگرنچ بوتگ ۔