اسلام آباد 'ایرانی گیس پائپ لائن ءَ پاکستانی سیمسر نزیک کرتگ

اسلام آباد [ ھالچار ]ایران ءِ ڈنی کارانی وزیر علی اکبر صالحی ءَ گوشتگ کہ ایران پاکستان ءِ توانائی ءِ لوٹانی پیلو کنگ ءَ ھمکاری ءَ برجاہ دار اِیت ۔ ایران پاکستان گیس پائپ لائن شوربندی دوھزار چاردہ ءَ برجم بنت ۔آئی ءِ گوشگ اَت کہ گڈی ءَ اے شورایمنی پائپ لائن گوشگ بیت ھرچ ملکے ءَ گیس پکار بیت اے پائپ لائن ھمود ءَ سر بیت ۔ یک جستے ءِ پسو ءَ آئی ءَ گوشتگ کہ ایران ءَ چَہ وتی نیمگ ءَ نود درسد پائپ لائن چیر گیپتگ ءُ آیوکیں یک سالے ءِ تہ ءَ آ داں باڈر ءَ سر بیت۔آئی ءِ گوشگ اَت کہ جھان ءَ گیش بیوکیں توانائی ءِ لوٹانی سبب ءَ پاکستان ءُ ایران ءِ ھمکاری بھمانگی ھبرے نہ اِنت ۔ ایران ءُ پاکستان ءِ میان ءَ باپار ءِ کساس داں پنچ ارب ڈالر ءَ گیش کنگ بوت کنت ۔پاکستان ءِ ھزانگی وزیر عبدالحفیظ شیخ ءَ گوشتگ کہ ایران پاکستان ءَ یازدہ سد میگاواٹ لین دنت یک ھزار میگا واٹ نیشنل گرڈ ءَ یک سد میگاواٹ گوادر ءَ دیگ بیت ۔پاکستان گوں ایران ءَ ریل ءُ روڈ نیٹ ورک ءَ گیش کنگ لوٹ اِیت ۔ پنچشنبے ءِ روچ ءَ اسلام آباد ءِ یک ھوٹلے ءَ دوئیں ملکانی میان ءَ ھمکاری یاداشت ءِ سر ءَ دزرند جنگ بوتگ ۔ اے درگت ءَ بوتگیں مراگش ءَ گوں تران کنان ءَ گوشتگ کہ ایران ءُ پاکستان دمگ ءِ دو پرارزشیں ملک اَنت ، دمگ ءِ بدل بیوکیں جاورانی تہ ءَ دوئیں ملکانی کردار ارزش دار ایت ۔آئی ءَ گوشتگ  کہ ایران ءَ  ایٹمی نپت بازاِنت ءُ پہ لین جاھاں بیست درسد افزودہ یورنیم جوڑ کنگ بوتگ ءُ اے میان اُستمانی ایٹمی انرجی ایجنسی ءُ دگہ میان اُستمانی ادارھاں مالوم اِنت ۔ چَہ فرانس ءِ نیمگ ءَ ایران ءِ سر ءَ اُرش ءِ بیھار ءِ پسو ءَ گوشتگ کہ چَہ اے رنگیں بیھاراں ایران نزور نہ بیت۔ علی اکبر صالحی ءَ گوں پاکستان ءِ تھی کارانی وزیر رحمن ملک ءَ گوں ھم دیوان کرتگ آھاں گوشتگ کہ جنداللہ ءُ تحریک طالبان پاکستان ، اسلام ءُ انسانیت ءِ دژمن اِنت ۔