بلوچستان جنگی جاوراں گوں دُچار اِنت، اھوالکاراں ھوار کس محفوظ نہ اِنت۔ براھمدگ بگٹی

بام: بی۔آر۔پی ءِ سروک واجہ براھمدگ بگٹی ءَ درملکی رسانکدر ءَ تران کنان ءَ گُشتگ کہ  بلوچستان سرکار ءِ دھشت گردیانی آماچ اِنت، جنگی جاوراں گوں دُچار اِنت۔ اے جاورھالانی تھا اودا اھوالکاراں ھوار ھچ کس محفوظ نہ اِنت۔ آئی ءَ گُشتگ من ءَ گوں  سلاہ بندیں گلاں  سیادی نیست۔ اے درگت ءَ اگاں خیربیارمری یا دگہ کسے ءَ  گوں سلاہ بندیں گلاں سیادی اَست تہ آ وتی جواب ءَ وت  شرتر دات کن اَنت۔۔۔ آئی ءَ گُشتگ منی وتی سیاسی گلے کہ آ سیاسی بنیاداں کار کنگ اِنت۔

براھمدگ بگٹی ءَ گُشتگ کہ من کجام  گلے ٰءِ نیمگ ءَ اھوالکارانی بیھار دیگ ءَ ایر جناں، او  آئی ءَ اے گپ رد کُتگ کہ بلوچ راجی جُنز آجوئیں رسانکدر ءِ دُشمن اِنت ءُ فاشسٹ جوڑ بوتگ۔  بلوچستان ءِ بلوچ  اھوال کار بہ بنت کہ شاعر ، یا کجام پِڑا چہ سیادی داروکیں مردمے، آ چہ سرکار ءِ کھر ءَ نہ رک اِتگ اَنت۔

آئی ءَ گُشتگ ماں بلوچستان ءَ پاکی لشکر ءِ زُلم ءُ زوراکی یکشلا برجاہ اِنت ءُ ٹپ ءُ ٹوریں لاش چگل دیگ بیئگ ءَ اَنت۔ راستیں گپ اِنت کہ اے بس یک طبقہے ءِ جیڑہ نہ اِنت بلکیں مئے صوتی ءُ شاعر ھم برداشت کنگ نہ بیئگ ءَ اَنت۔  بلوچ اھوالکار ھم کُشگ بیئگ ءَ اَنت۔ 

بلوچستان ءِ اصل جیڑہ ءِ سرا نادلگوش کنگ ءِ ھاترا بس ھمے گمان دیگ بیئگ اِنت کہ اودا کس ءَ برداشت نہ کناں، چارگ لوٹیت کہ ھالکارانی بیھار دیگ ءِ پُژدر ءَ کئے اِنت۔

آئی ءَ گُشتگ اے ھم چارگ لوٹیت کہ  ماں بلوچستان ءَ پاکی لشکر ءِ دھشت گردی (زُلم ءُ زوراکی) یکشلا برجاہ اِنت۔  مردم آوار جنگ بئیگ ءَ اَنت۔ ( پاکی سرکار ءِ نیمگ ءَ) بمب گواری بیئگ اِنت۔ بلے بلوچستان ءِ دیر ءُ دراجیں ھند ءُ دمگانی ھالاں کس پوہ ءُ سرپد نہ اِنت کہ چی بیئگ اِنت۔