امریکای شرکت ٹرانسپیرنٹ لینگوئج ءَ پہ وتی ھیلکاری پروجیکٹ ءَ زبان زانتے پکار اِنت

نیوھمپشایر : پہ زبانانی ھیلکاری ءَ نرم ابزار بزاں سوفٹ ویئر جوڑ کنوکیں امریکای شرکتے ءَ  پہ بلوچی سوج دئیگ ءَ ھم سوفٹ ویئر  جوڑ کنگ ءِ چن لانچ بنا کرتگ ۔ اے درگت ءَ ٹرانسپیرنٹ لینگوئج ءِ پروجیکٹ منیجر پْرسیھلہ کْوالھن ءَ بلوچی وب تاکانی سرءَ دیم داتگیں کلو ءِ تہ ءَ گْوشتگ کہ مئے گْور ءَ پہ  بلوچی زبان ءَ نوکیں پروجیکٹےھست پہ ایشی ءَ مارا زبان زانتے پکار اِنت ۔ انچیں کسے کہ بلوچی ءِ گچینی نوشتانکی زبان ءَ ھم بہ زانت ءُ وانینگ ءُ سوج دئیگ ءِ بودشت ئِے ھم بہ بیت ۔
اے درگت ءَ ھدوناک  گوں بانک پْرسیھلہ ءَ چَہ جھل ءَ داتگیں ڈس ءُ نشاناں اھوال گیپت کن اَنت ۔ 

دلگوشی ھبرے کہ ٹراسپیرنٹ لینگوئج ءِ لڑ ءَ درسی بیست ءُ ھپت زبان اَنت زرباری ایشیا ءِ زبانانی تہ ءَ اُردو ، دری ءُ پشتو ھوار اَنت اے ھساب ءَ  اگاں چَہ دگہ زرباری زباناں پیسر بلوچی ٹرانسپیرنٹ لینگوئج ءِ لڑ ءَ ھوار کنگ بہ بیت اے لڑ ءَ زرباری ایشیا ءِ  چارمی ءُ میان ایشیا ءِ اولی زبان بیت ۔ 

ٹرانسپیرنٹ لینگوئج یک شرکتے کہ پہ زبان ءِ دربرگ ءَ سوفٹ ویئر جوڑ کنت ۔ ٹرانسپیرنٹ ءِ گْوشگ اِنت  کہ چَہ آئی ءِ کاراں بازیں سرکاری ءُ مردمی ادارہ سوت زورگ ءَ اَنت ۔ 

یک امریکای شرکتے ءِ بلوچی زبان ءِ سر ءَ پروجیکٹ بنا کنگ ھمے شون دنت کہ میان اُستمانی تک  ءَ بلوچی زبان ءَ ھم پہ وتا جاھے شوھاز کرتگ ۔ نوکیں دور ءَ زانتکارانی ھمے سوج اِنت کہ '' زبانے کہ وب ، موبائل ءُ دگہ ھمروچیگیں کارمرد بیوکیں دزگاھانی زبان مہ بیت دیمروی نہ کنت ءُ آئی ءِ بدل ءَ ھما زبان دیم ءَ رو اَنت کہ ھمے دزگاھانی زبان اَنت ۔ ''

اے رِد ءَ ھما زانتکار ءُ بلوچی ءِ ھذمتگر داد کرز اَنت کہ آھاں کمتریں آسراتیانی تہ ءَ پہ وتا راہ شوھاز کرتگ ءُ بلوچی زبان ھم نوکیں رسانکی زبانانی رم ءَ ھوار داتگ ھمے جھدانی برورد اِنت کہ بلوچی زبان دنیا ءِ گیشتریں   میڈیا ءُ سوشل نیٹ ورکانی تہ ءَ نویسگ بوگ ءَ اِنت ۔ ٹرانسپیرنٹ لینگوئج ءِ اے گامگیج پہ بلوچی نویسگ ءَ ھم بہ گند ئے نوکیں آسراتیانی درے پچ بہ کنت ءُ بلوچی یک جتائیں  اسکرپٹے ءَ نویسگ بہ بیت ۔ 

گوں اے پروجیکٹ ءَ کسے کہ ھمگرنچ بیت پہ آئی ءَ گْرانتریں کار بلوچی بنرھبند ءِ سرپد بوگ ءُ سرپد کنائینگ ءَ ابید پہ ھما آب ءُ گالانی نویسگ ءَ کی بورڈ ءُ اسکرپٹ ٹھینگ اِنت کہ اُردو کی بورڈ ءِ سر ءَ جْوانی ءَ نویسگ نہ بوگ ءَ اَنت ۔ اگاں کْوالھن یا ٹرانسپیرنٹ پہ بلوچی زبان ءَ جتائیں اسکرپٹے جوڑ کنگ ءِ نیمگ ءَ ھم دلگوش بہ دئے اَنت اے پہ شرکت ءَ سوتمند ءُ پہ بلوچی ءَ ھم جْوانیں کارے بیت ۔