پاکی سپریم کورٹ ءَ ٹپانی واد پْریچگ ءَ جاھے پشت نہ داتگ ' شد کشیں ھڑتالی

شال : پاکستانی سرکار ءِ آوار جتگیں بلوچ زندانیانی کھولانی نیمگ ءَ بستگیں شُد ھڑتالی گدان ءَ ھشت سد ءُ چل ءُ شش روچ سر جم بوتگ ۔  گوں  کھولاں ھمدردی ءَ شد ھڑتالی گدان ءَ ھمک لیکو ءُ ھیالداریں مردمانی آھگ ءِ دْرچ برجاہ اِنت ۔ شد کشیں ھڑتال کنوکاں پاکستانی سپریم کورٹ ءِ سر ءَ ایراد گران گْوشتگ کہ پاکستانی سپریم کورٹ ءَ آوار جتگیں بلوچانی کھولانی ٹپانی سر ءَ واد پْریچگ ءَ جاھے پشت نہ داتگ چَہ آئی ءِ بڈگ ءُ دروگیں گپاں کھول دم بُرتگ اَنت ۔ شش ماہ اِنت کہ چیف جسٹس افتخار چوھدری برے کھولاں اسلام آباد ءُ برے شال ءَ لوٹ اِیت بلے پرمان دات نہ کنت انچوش گمان بیت کہ سپریم کورٹ وت ھم پاکستانی ایجنسی ءُ اسٹیبلمشمنٹ ءِ دیم ءَ بے وس اِنت ۔
کھولاں گْوشتگ کہ مئے گْور ءَ زر ءُ مالے نہ منتگ کہ اسلام آباد ءَ بہ رو اِیں پمیشکا چیف جسٹس ءَ ھرچ پرمان ئِے دئیگی اِنت شال رجسٹری ءَ بہ دنت داں کھولانی دیم ءَ گپ بہ بنت ءُ ایف سی ءُ ایجنسی سپریم کورٹ ءِ دیم ءَ وتی دروگاں بند بہ کن اَنت ۔ بلوچ پراری کیمپ ھچ جاہ ءَ نیست دیم شریتگیں میتاں انسرجنسی گْوشگ وت آھانی دروگاں پاشک کنت ۔
آئی ءَ دلگوشگْور کرتگ کہ نوں اے گْوشگ مہ بیت کہ  کھولاں گوں سپریم کورٹ ءَ ھمکاری نہ کرتگ رسانکدر گواہ اِنت سئے سد ءُ شست ءِ کساس ءَ کماشیں مات ءُ پت ءُ گھارچار روچ ءَ آمید گس ءِ دیم ءَ نشتگ ءُ اَرس گْوارگ ءَ پد لوگاں واتر بوتگ اَنت ءُ نوں کس پہ اسلام آباد ءِ روگ ءَ ساڑی نہ اِنت درس مالی تک ءَ نزور اَںت ءُ کھولانی گوشدارگ ءَ ابید اے کیس ءِ ھچ رنگیں سوت ءُ بستار نیست ۔