
پاکستان ءَ سیاسی پارٹیانی روانک ءُ جاکا بُستاں یک رندے پد ءَ اُود ءِ واکمندانی تاھیر بُرتگ ۔
ملک ءِ سر وزیر نوازشریف ءُ پنجاپ ءِ مزن آمیدگس ءِ مزن آمیدگر جسٹس شاھد حمید ءَ ھم تُرس پدر کُرتگ کہ آھاں اگاں وتی ذاتی نپ ءُ سوتانی جنگ یلو نہ کُرت گڑا پاکستان پُرش اِیت ۔
مزن وزیر ءَ وتی دْرشانے ءِ تہ ءَ گْوشتگ کہ اے ھبر ایوک پہ آئی ءِ سرکار ءَ بیمے نہ اِنت بلکیں پہ ملک ءِ سلامتی ءَ ھم مزنیں تُرسے ۔ آئی ءِ سرکار نہ پُرش اِیت بلکیں ملک پُرش اِیت ۔
زانگ بہ بیت کہ پاکستان ءِ سیمی مستریں سیاسی گل پاکستان تحریک انصاف کہ پاکستانی اُستان خیبرپختونخواہ ءَ واکداری ھم کنگ ءَ اِنت چَہ نوازشریف ءِ سرکار ءَ زھر اِنت ءُ بھتام جنگ ءَ اِنت کہ نوازشریف ءَ ماں گچینکاری ءَ مردمانی واھگ دُز اِتگ اَنت ءُ انیگیں سرکار گوں دُزاِتگیں ووٹاں جوڑ بوتگیں سرکارے ۔
بندات ءَ آئی ءَ لوٹ کُرت اَت کہ باید گچینکاریاں بوتگیں گوچلیانی پٹ ءُ پول بہ بیت ءُ ووٹ گشتے پد ءَ ھساب بہ بنت بلئے نوازشریف سرکار ءَ اے ھبر کِمار نہ کُرت اَت البت اے وھدی نوازشریف تحریک انصاف ءِ سروک عمران خان ءِ لوٹانی منگ ءَ ساڑی اِنت بلئے خان ھچ گْونگ ءَ آئی ءِ ھبرانی گْوشدارگ ءَ ساڑی نہ اِنت ءُ جارے جتگ کہ آ چاردہ اگست ءَ اسلام آباد روانکے بارت ءُ ھمود ءَ نندانک اَنت ۔
دومی نیمگ ءَ طاھرالقادری نامی ملاھیں سیاستدانے کہ منھاج القرآن رنگیں ادارھے ءِ پجیگ ءَ سیاسی گل پاکستان عوامی تحریک ءِ سروک اِنت ھم چَہ سرکار ءَ زھر اِنت ءُ گچینکاری رھبندانی تہ ءَ گھتری ءِ لوٹ کنگ ءَ اِنت ۔
آَئی ءِ پجیگ ءَ ملاھانی دگہ دو ٹولی سنی اتحاد ءُ وحدت المسلمین ھم گُون اَت ، وحدت المسلمین شیعہ ھانی گل اِنت ءُ آئی ءِ ھمراھداری ءِ سبب ءَ شیعہ ھم مزنیں کساسے طاھرالقادری ءِ زھرشانی ءِ ھمراھداری کنگ ءَ اَنت ، چَہ ایشاں ابید گْوستگیں سرکار ءَ مشرف ءِ پلہ مرزیں سیاستکار شیخ رشید ءُ چوہدری شجاھت ھم طاھرالقادری ءِ ھمراہ اَنت ۔
طاھرالقادری نوازشریف ءِ سرکاری ءِ ھلاسی ءِ لوٹ کنگ ءَ اِنت پمیشکا یک رندے پد ءَ پاکستان ءِ تہ ءَ فوجی واکمندی ءِ گمان دْرشان کنگ بوگ ءَ اِنت ۔
Comments[ 0 ]
Post a Comment