نودبندگ دروگ بند اِیت ، سیف اللہ بے میار اَت ' شھیدسیف الدین ءِ لوگ ءِ مردمانی بیان

پ ر .   شھید سیف الدین ءِ لوگ ءِ مردماں وتی شنگ کُرتگیں پریس ریلیز ءِ تہ ءَ گْوشتگ کہ روتاک توار ءَ کالم نویس  نودبندگ ءَ بی ایل اے ( بلوچ لبریشن آرمی ) ءِ جھگیری کنان مئے کھول ءِ سر ءَ بے بنیں بھتام جتگ کہ آھاں گوں راستی ءَ ھچ رنگیں سیادی نیست ، اے بے بنیں بھتامانی مراد وتی میارءَ  چیر دیگ ءُ بلوچ راج ءِ رپینگ ءَ ابید ھچی نہ اِنت ۔

شھید سیف الدین ءِ لوگ ءِ مردماں بیان ءِ تہ ءَ گْوشتگ کہ ھما روچ ءَ سیف الدین شھید کنگ بوتگ ما گوں بلوچ نیشنل موومنٹ ءِ بنجاھی راھشوناں اھوال کُرت ءُ چَہ بی ایل اے ءَ اے کوش ءِ درگت ءَ جست کُرت کہ شمئے کر ءَ اے پہ اے ھبر ءِ راستی ءَ چِہ دلیل ھست ، انچوش کہ ما بی ایل ایف ءِ ردمنی دور کُرتگ اَت ۔

آئی ءَ پمیشکا نشانگ کنگ کہ پیش ءَ ھم نشانگ بوتگ ، ناانصافی یے ۔ چَہ مئے ھبراں مارا پارٹی ءَ گْوشتگ کہ شما ھمت بہ کن اِت سیف الدین مئے دوزواہ بوتگ ما آَئی ءِ درگت ءَ گوں بی ایل اے ءَ وت تماس گر ءُ پٹ پول کن اِیں ۔ پمیشکا مئے کھول ءَ ھچ نہ گْوشتگ بلئے دائم گوں بی این ایم ءِ راھشوناں بی ایل اے ءِ دلیلانی درگت ءَ جست گیپتگ ، مدام ھمے پسو رستگ کہ ما گوں بی ایل اے ءَ اے درگت ءَ جست کُرتگ بلئے آ ھچ رنگیں جواب نہ دیگ ءَ اَنت ۔

مروچی بی این ایم ءَ  گوں بے میاریں بلوچ پسگے  ءَ کہ گوں آھانی گل ءَ ھمگرنچ اَت ، انصاف کُرتگ ءُ شھید من اِتگ گڑا مُرتگیں مردمے ءِ پشت ءَ بے بنیں بھتامانی جنگ بندات کنگ بوتگ ۔

روتاک توار ءَ نودبندگ نامیں مردے ءَ بی ایل اے ءِ جارکش ءِ بستار ءَ ھما بے سریں بھتام کہ مئے سر ءَ جتگ اَنت مروچی ما پہ راہ اِنت کہ آ بھتاماں وتگڑ بہ منارین اِیں ۔

شھید طارق کریم ءِ لوگ ءَ میڑھ برگ ءُ شھید ءِ لوگبناک ءِ بی ایل اے ءَ کلو کنگ سکیں سبک ، شرمناک پدریں دروگ ءُ بلوچ مھلوک ءِ چمانی بندگ ءِ رِپک اَنت ۔ ھمے میان ءَ سیف الدین بِھ چیر نہ بوتگ بلکیں سرکاری کارمندے ءِ بستار ءَ دائم ڈیوٹی داتگ ئِے انچوش کہ ھزارھاں وانندھیں بلوچ کنگ ءَ اَنت ، ایشی ءِ تہ ءَ شکی بوگ یا شکی جاہ ءَ روگ ءِ ھبر تیوک وتی گپ ءِ منارینگ ءَ جوڑ کُرتگیں دروگ اِنت ۔

شھید سیف الدین ءِ لوگ ءِ مردماں گْوشتگ کہ نودبندگ ءَ گوں دروگیں بھتاماں مئے کھول ءِ دگہ باسکے '' ڈاکٹر پلانی '' ءِ نام ءَ بی این ایم ءِ راھشون ءِ ھساب ءَ پدر کُرتگ داں پاکستانی سرکار  مارا بہ جنت ءُ اے سکیں کپتگیں کارے ، پرچا کہ درس زان اَنت بی این ایم ءِ راھشون اے وھدی سرکار ءِ زور ءُ جبر ءِ آماچ اَنت ، اے رِد ءَ اگاں مئے کھول ءِ مردمے ءَ تاوان رست ذمہ واری ھمیشانی ءِ سر ءَ بیت ۔ مروچی ما گوں راج ءُ پوھیں مردماں ھمے دزبندی کن اِیں کہ آ اے گل ءِ بے بنیں بھتاماں گوش مہ دار اَنت ۔