ایران : احمدی نژاد ءِ یونیورسٹی ءَ وانینگ بندات کُرتگ

ایران ءِ پیشیگیں مزنواک محمود احمد نژد ءِ نزیکیں مردم غلامحسین الھام ءَ گْوشتگ کہ احمدی نژاد ءِ کارمستری ءَ '' دانشگاہ جامع ء ایرانیان '' ءَ وتی کار بندات کُرتگ ۔

غلام محسین احمدی نژاد ءِ سرکار ءِ جارکش بوتگ ، اے درگت ءَ دیوانے ءَ اھوالکارانی جستانی پسو دئیان ءَ گْوشت ئِے کہ '' نودربر ءُ دانشجاہ ءِ درگت ءَ مالومداری دانشجاہ ءِ تندہ جاہ دیگ بوتگ اَنت ۔  ''

ایران ءِ سرکاری نیوز ایجنسی ایرنا ءِ اے جست ءِ پسو ءَ کہ'' ایران ءِ زانشت ءِ وزارت ءَ نام گیپتگیں دانشگاہ چَہ راھبند ءَ ڈن لیک اِتگ ،آئی ءَ گّْوشت : '' آ کہ بھتام جن اَنت باید دلیل بَہ یار اَنت ۔ ''

زانگ بہ بیت کہ احمدی نژاد ءِ سرکار ءِ گڈی وھد ءَ آئی ءِ گوں ایرانی رھبر ءَ بگیری پدر بوتگ اَنت ءُ آئی ءُ رھبر ءِ پلہ مرزانی میان ء واک ءُ توان ءِ سر ءَ گر ءُ چل ھمینکس گیش اَت کہ احمدی نژاد داں سئے روچ ءَ وتی کارگس ءَ ھم نہ شت ۔

ایوک احمدی نژاد ءِ دانشجاہ نہ اِنت کہ آئی ءِ نام ھالتاکاں گرگ بہ بیت بلکیں سیاسی مردمانی کساسے آئی ءِ پلہ مرزانی ھست کہ ایرانی سیاست ءِ تہ ءَ توانمند زانگ بنت  ءُ اگاں رھبر ءِ پلہ مرز آئی ءِ سرگرمیانی دیم ءَ میلانک بہ بنت ایران ءَ دگہ گرچِلے بنا بوت کنت ۔