بلوچ راج ءِ کُشت ءُ کوش ءُ چُک چینی ءَ پاکی رسانکدر ءُ سرجمیں ”ادارہ“ ھوار اَنت۔ بلوچ رھشون براھمدگ بگٹی

بام: بلوچ ری پبلکن پارٹی ءِ سروک ، بلوچ رھشون واجہ براھمدگ بگٹی ءَ وتی ھالترانے ءَ گُشتگ، منی درانڈیھی ءِ بابت ءَ اسٹبلشمنٹ ھما بے سریں گپاں دیم ءَ آرگ اِنت۔ اے پندل ءُ بھانہ اَنت۔ وھدیکہ من اوغانستان ءَ جاھمنند بوتگ اَنت تہ پاکی اسٹبلشمنٹ ءَ ھمے بھتام جتگ کہ من ماں اوغانستان ءَ فراری کیمپانی سروکے ءَ کنگ ءَ یاں، وھدیکہ کسے تُپنگ ءَ چِست بہ کنت ءُ کوہ ءَ در بہ کپیت تہ پاکی سرکار ءِ بھتام ھمیش بیت کہ دھشت کردے، وھدیکہ من سویٹزرلینڈ ءَ سربوتگ اَنت تہ اسٹبلشمنٹ ءِ گورا دگہ ھچ وڑیں گپ نیست تہ آ ھمے گپ ءَ دیم ءَ کاریت کہ ما درملک ءَ نشتگ ایں ءُ لس مھلوک ءَ جنگ ءِ سکین ءَ دیگ ءَ اِنت۔ اے یک جُتائیں جیڑھے، اے جُست ءَ من ءَ بلوچ برات بہ کناں کہ تو چی کنگ ءَ یے ءُ ماں راجی جُنز ءَ تئی کرد چی اِنت؟

واجہ براھمدگ بگٹی ءَ یک جُستے ءِ پسہ دیان ءَ گُشتگ کہ شُما لوٹ یے کہ من دوبر پاکستان ءَ واتر بہ کناں ءُ منی نام ھم آوار جتگیں مردمانی لَڑ ءَ ھوار بہ بیت یا منی لاش چو دگہ ورناھاں یک ویرانیں دگے ءَ بہ کپیت۔ شُما کہ ھمیشی ءَ لوٹ یے ، اے وا دگہ گپے، آئی ءَ گُشتگ راجی جُنز ءِ تھا ھرکسے وتی جتائیں کردے بیت۔ ھرکسے وتی کار رھبند بنت۔ منی وتی یک سیاسی گلے۔ اے گپ مئے سنگتاں ھواری ءَ نندگ ءُ گیشینگی اِنت کہ کئے کُجام کرد ءَ پیلہ بہ کنت۔ مرچی ھما جاور پیدا بوتگ اَنت۔ مئے سیاسی باسک ماں بلوچستان ءَ ھما جاوراں گوں دوچار اَنت۔ سیاسی پڑا ھچ کس ءَ کار کنگ ءِ موہ دیگ بیئگ ءَ نہ اِنت۔ کسے کہ کمے ایکٹیو بیت، تاکہ پریس کانفرنس کسے بہ کنت تہ آئی ءَ پاکی چیریں دست آوار جن اَنت ءُ بیگواہ کنگ بیت، اے درچ چار پنچ سالاں یکشلا برجاہ اِنت۔ اے جاوراں کجام گلے ءِ سروک بلوچستان ءَ بہ نندیت ، اے شُمئے پد نبودیں ھیالے۔ گپ اے نہ اِنت کہ کئے کُجا نِشتگ، گپ ایش اِنت کہ کئے چی کنگ اِنت۔ براھمدگ ءَ یک جُستے ءِ پسہ ءَ درائینتگ، گوں پاکستان ءَ منی ھچ وڑیں سیادی نیست، من بَس بلوچستان ءِ گپ ءَ جناں۔

واجہ براھمدگ بگٹی ءَ اے گپ ءِ راستی من اِتگ کہ ماں اوغانستان ءَ القاعدہ ءُ دھشت گرد گلاں آئی۔ایس۔آئی ءِ کمک ءَ منی شھید کنگ ءِ بے سوبیں توجیل ساز اِتگ۔ اے ردا آئی ءَ گُشتگ کہ منی بے سوبیں کوش ءِ توجیل ساز اوگان سرکار ءَ دزگیر کُتگ اَنت ءُ آھاں اے گپ وت من اِتگ کہ آھاں پاکستان ءِ گُشگ ءِ پدا واجہ براھمدگ بگٹی ءِ شھید کنگ ءِ توجیل ساز اِتگ۔ آئی ءَ گُشتگ اوغان ھالکارے ءَ اے گپ من اِتگ کہ پاکی سرکار ءَ من ءَ زر من اِتگ کہ نواب براھمدگ ءَ شھید بہ کَن۔

براھمدگ بگٹی ءَ یک جُستے ءِ  پسہ ءَ درائینتگ کہ کجام اخبارے ءِ منی ماں سویٹزرلینڈ ءَ پناہ زورگ ءِ بابت ءَ شِنگ بوتگیں گپانی من ذمہ وار نیاں، اے گپ چہ ھما ھالتاکاں جُست کنگ بہ بیت۔ صد ھالتاکاں ءُ صد دروگ بند اَنت۔  من ناں یو۔این۔سی۔آر۔سی ءَ نمدی نبشتہ کُتگ ءُ دیم داتگ ءُ ناں چوشیں گپے بیتگ۔ من ءَ چوشیں نمدی نبشتہ کنگ ءِ ضرورت ھم نہ اِنت ، وھدیکہ من اوغانستان ءَ بوتگاں تہ منی گوں یو۔این۔سی۔ آر.سی ءِ سروک ءَ یک ءُ دو رندا گند ءُ نند ھم بیتگ ، دگہ بازیں گلاں ھم منی ملاقات بوتگ۔  چوشیں نمدیانی مقصد ءُ مول چی اِنت۔ زانگ نہ بیت کہ شُما کجام نمدی ءِ گپ ءَ جنگ ءَ یے؟ آئی ءَ گُشتگ کہ من ءَ پناہ یو۔این۔سی۔آر۔سی ءِ گُشگ ءِ پدا نہ رَستگ۔ ناکہ من چہ یو۔این۔سی۔آر۔سی ءَ دزبندی دیم داتگ۔ آئی ءَ گُشتگ کہ منی ماں درانڈیھ ءَ پناہ زورگ ءِ مول ءُ مراد ھمیش بوتگ کہ ماں بلوچستان ءَ منی زند خطرہ ءِ تھا بوتگ۔ اے بھادر ءُ بزدلے ءِ گپ نہ اِنت، ناکہ من کدی گُشتگ کہ من بھادرتریں انساناں۔ البت من یک راجی پارٹی ءِ رھشونے ءَ کنگ ءَ یاں۔ 

براھمدگ بگٹی ءَ یک جُستے ءِ پَسہ دیان ءَ گُشتگ کہ وھدیکہ پاکی سرکار گُشیت کہ آجوئی لوٹوک دو درصد اَنت، گُڑا شُما چیا اینکہ پریشان یے؟ شُما پریشان بئیگ ءِ ھچ ضرورت نہ اِنت وھدیکہ بلوچ الس ءِ گیشتریں بھر شُمئے ھمراہ اِنت۔ آئی ءَ گُشتگ کہ پاکی سرکار گُشیت بلوچ الس ءِ گیشتریں بھر منی ھمراہ اَنت۔ بس لھتے بلوچ اَنت آجوئ لوٹاں، تہ پاکستانی قبضہ گیر لشکر چہ بلوچستان ءَ کَشگ بہ بیت ءُ یو۔این۔او ءِ چیر دستی ءَ ریفرنڈم کنگ بہ بیت تہ زانگ کہ چِنکہ بلوچ پاکی سرکار ءِ ھمراہ اَنت ءُ چنکہ آجوئی لوٹ اَنت۔ چنکہ بلوچ شُمئے گُما نندگ نہ لوٹ اَنت۔

براھمدگ ءَ گُشتگ کہ مارا گوں پٹھاناں ھچ وڑیں جیڑہ نیست۔آھانی جتائیں جیڑھے۔ آھانی وتی کاررھبند ءُ وتی لیکہے۔ بلے ھما بلوچ کہ پاکی پارلیمنٹ ءَ نِشتگ اَنت۔ آ آئی۔ایس۔آئی ءِ گُشگ ءِ پدا کار ءَ اَنت۔ اے دگہ گپے ءُ من اے جیڑہ ءَ کپگ نہ لوٹاں۔ بلے گپ ایش اِنت کہ شُما اے سئے ءُ چاریں مردمانی گورا چیا تُرسگ ءَ یے؟ بلوچستان ءَ ورناہ گار ءُ بیگواہ کنگ بیئگ اَنت ءُ آھانی ٹپ ءُ ٹوریں لاش ماں وریاناں چگل دیگ بیئگ ءَ اَنت۔ اے بس ھمے سئے ءُ چاریں مردمانی سوب ءَ بیئگ اِنت۔ اے گپ ءَ شُما وت منگ ءَ یے کہ ھمے سئے ءُ چاریں کَس بلوچستان ءِ الس ءِ رھشونے ءَ کنگ ءَ اَنت ءُ بلوچ الس بس ھمیشانی چیردستی ءَ ھمتپاک ءُ یکمشت اَنت۔ براھمدگ بگٹی ءَ گُشتگ کہ پاکی لشکر ءِ گپچلانی آماچی ءِ نشان ھمیش اِنت کہ کجام مردمے سیاسی گلے ءَ ھوار بہ بیت تہ پاکی چیریں دست آئی ءَ آوار جنَنت ءُ شھید کن اَنت ءُ آئی ءِ ٹپ ءُ ٹوریں لاشاں ماں دَگ ءُ ویراناں چگل دینت۔ اے کُشت ءُ کوش ءَ پاکی سرکار ءِ مول ءُ مراد ھمیش اِنت کہ مردم بہ تُرس اَنت ءُ چہ وتی راجی آجوئی ءِ لیکہ ءَ پَد بہ کِنزاں۔

براھمدگ بگٹی ءَ گُشتگ بلوچ راج ءِ کُشت ءُ کوش ءُ چُک چینی ءَ پاکی رسانکدر ءَ ھوار سرجمیں ”ادارہ“ ھوار اَنت۔ پاکی رسانکدر مئے گپانی گوشدارگ ءَ برداشت نہ کَنت۔ پاکستان ءِ ھمک ادارہ بلوچستان ءَ وتی کالونی ئے سرپد بنت۔ آھاں بلوچ ءِ ضرورت نہ اِنت بلکیں بلوچ ڈگار ءِ ضرورت اِنت۔ دھشت گرد پاکی فوج اِنت کہ بلوچ ءِ ڈیھے ایردست کُتگ ءُ بلوچ ءِ نسل کُشی ءَ کنگ اِنت۔ بلے پاکی رسانکدر ءِ مثال ھمیش اِنت کہ آ فوج ءَ وتی سرپد بیت ءُ بلوچ ءَ درآمد۔۔۔۔۔ پاکی رسانکدر ءِ عملاں چہ ھمے نشون رسیت۔ پاکی رسانکدر ءَ گوشدارگ ءِ قوت کہ نیست تہ انٹریو چیا گیپت۔ آئی ءَ گُشتگ ماں بلوچستان ءَ لشکر کشی ءُ بلوچ ورناھانی آوار جنگ ءُ شھید کنگ ءِ رد یکشلا برجاہ اِنت۔ ڈیرہ بگٹی بہ بیت یا ایردستیں بلوچستان ءِ کجام ھمد، اودا رسانکدر ءَ رؤگ ءِ اجازت دیگ نہ بیئگ اِنت۔ وھدیکہ یو۔این۔او ءِ ٹیمے بلوچستان ءَ تر ءُ تاب ءَ کییت تہ پاکی سرکار ایشی ءَ وتی تہ ءُ توکی جیڑھاں مداخلت سرپد بیت۔ اگاں پاکی رسانکدر ءَ بلوچ ءِ درد بہ مار اتیں تہ آھاں ماں بلوچستان ءَ فوجی آپریشن ءُ بلوچ الس ءِ سرا زلم ءُ زوراکیانی سرا زھرشانی کُتگ اَت۔ ماں بلوچستان ءَ پاکی لشکر کُشت ءُ کوش کنت، اے کُشت ءُ کوشانی پٹ پُ پول ءَ کسے کئیت تہ پنجاب ایشی ءَ مداخلتے سرپد بیت۔

نواب براھمدگ بگٹی ءَ کُشتگ ما چہ تاریخ ءَ سبق زُرتگ۔ ما وتی چماں گوں دیستگ کہ مئے گُما چی بیئگ اِنت۔ چی بیتگ۔ پاکی جنرلاں ھوار ھمک سرکاری باسک بلوچ ءِ چُکچینی ءَ ھوار اَنت۔ آئی ءَ جُستے پسہ ءَ گُشتگ  من ءَ گوں شُمئے ملک ءَ ھچ وڑیں سیادی نیست۔ بلے راستی ایش اِنت کہ شُمئے مُلک ءَ ھروھد ءَ حاکم فوج اِنت۔ ھچ وھد ءَ السی نمائندہ دیم ءَ نیاتکگ اَنت۔ بلوچ ءِ گُما بندات ءَ بگر تاں انو زلم ءُ زوراکی جاری اِنت۔ بلوچ ءَ را وت ماں وت ءَ میڑینگ ءِ جھد کنگ بوتگ۔ یک ٹکے ءَ گوں دومی ٹک ءَ جنگ دیگ ءِ جھد بیئگ اِنت۔ سرداری سسٹم ءَ بھانہ جوڑ کنگ بیت ءُ پدا وتی وتگڑیں سردار دیم ءَ آرگ ءُ نادینگ بنت۔ بلوچ ءَ را وت ماں وت ءَ میڑینگ پاکی سرکار ءِ پندلے۔ 

آئی ءَ جُستے پسہ ءَ گُشتگ کہ پاکی سرکار ءِ جھد ھمیش اِنت ءُ بلوچ راج گار ءُ بیگواہ بہ بیت۔ ناں بلوچ پشت بہ کپیت ءُ ناں بلوچ ءِ جیڑہ۔۔۔آئی ءَ گُشتگ پاکی سرکار ءَ سرجمیں ذمہ وار پنجابی نیاں، بلے بلوچ ءِ سرا زُلم ءُ زوراکی کنوک ءُ بلوچ ءِ ایردست کنوکانی گیشتریں بھر پنجابیانی اِنت۔ پاکی فوج ءِ مزنیں اگدھانی واجہ گیشتر پنجابی اَنت۔ پنجاب ءَ بلوچ ءَ نہ لوٹیت، بلکیں بلوچ ڈگار ءَ لوٹیت۔ اگاں بلوچ ءِ سرجمیں مال ءُ مڈی بلوچ ءِ سرا ھَرچ کنگ بہ بنت تہ درستاں چہ پیسر شُما (پنجابی) گُشئے کہ بلوچستان چہ ما سِندگ ءُ جُتا کنگ بہ بیت۔ 

براھمدگ بگٹی ءَ گُشتگ اے آئی۔ایس۔آئی ءِ شون داتگیں گپے کہ بلوچ آجوئی لوٹوکیں گَل یکمُشت ءُ تپاک نہ اَنت۔ من ھمے سرپد باں ڈاکٹر اللہ نظر بلوچ بہ بیت، من بہ باں یا کجام بلوچ، ما درست یکیں، ما کریڈٹ ءِ ھاترا جھد کنگ ءَ نہ اِنت، ما وتی راجی پجار ءُ راجی وجود ءِ رکینگ ءِ جُھد ءَ کنگ ءَ اِنت۔ اے گپ نہ اِنت کہ من کنگ ءَ آں، کریڈٹ دومی ءِ سرا رؤگ اِنت، یا دومی وزیر ءُ گزیر جوڑ بیت۔ اے بلوچ راجی پجار ءِ جنگ اِنت۔ آئی ءَ گُشتگ ڈاکٹر اللہ نظر ءِ سیاسی چہ بی۔ایس۔او ءَ بیتگ۔ وھدیکہ پہ راجی جد و جھد ءَ پَر آئی ءَ سرجمیں راہ ءُ دِر بند کنگ بیتگ اَنت، آ آوار جنگ بوتگ ءُ نیم مُردگیں ھالتے ءَ یلس کنگ بیتگ۔ تہ آ لاچار بوتگ کہ آ وتی دفاع ءُ  راجی پجار ءِ رکینگ ءِ ھاترا سلاہ بندیں رھبند ءَ گچین بہ کَنت۔ آئی ءَ گُشتگ من بہ باں یا اللہ نظر ما یکیں ءُ مئے میان ءَ ھچ وڑیں فرق نیست ءُ بَس بلوچ راجی جنز ءِ ھاترا کار کنگ ءَ اِنت۔ البت ڈاکٹر اللہ نظر ءِ وتی کار رھبند اَنت ءُ مئے وتی، مئے سیاسی گلے ءُ سیاسی انداز ءَ مھلوک ءَ موبلائز کنگ ءَ اِنت۔ ڈاکٹر اللہ نظر کارے کَنت تہ اے کریڈٹ ھمائی ءِ سرا رؤت ءُ من کناں آ کریڈٹ منی سرا رؤت۔ 

براھمدگ بگٹی ءَ گُشتگ کہ اش کنگ ءَ ”جان سولکی“ ءِ آوار جنگ ءَ بلوچ گروپے ءِ دست ھوار بوتگ۔ من اولسرا اے عمل ءِ مذمت کُتگ ءُ ھالتاکانی وسیلت ءَ  سنگتاں ھمے نشون داتگ کہ چَرے عمل ءَ میان استمانی سطح ءَ بلوچ جُھد ءَ تاوان رسیت۔ آئی ءَ گُشتگ گوستگیں پنچ سالاں ماں بلوچستان ءَ زلم ءُ زوراکی ءُ پاکی لشکر ءِ بمبارمنٹ یکشلا برجاہ اِنت۔ وھدیکہ رسانکدر راستیں گپ ءَ دیم ءَ نیاریت۔ بلوچستان ءَ ورناھاں آوار جنگ بیت ءُ آھانی ٹپ ءُ ٹوریں لاش ماں دگ ءُ ویراناں چگل دیگ بنت۔ ما پیش ءَ چہ پٹھان ءُ پنجابیاں دزبندی کُتگ کہ اے جاوراں چہ بلوچستان ءَ در بیاھاں۔ شُما ادا کجام کار ءِ ھاترا اَتکگ یے؟ ما سُچگ ءَ اِنت۔ ما مرگ ءَ اِنت۔ شُما کا اِت ءُ وتی مال ءُ مڈیاں گیش کن یے، دکانداری ءُ بزنس کن یے۔ مئے دزبندی ھمیش اِنت کہ اے وھد ءَ وتی کار ءُ بار ءَ دگہ دمگاں بہ کن یے، ادا چہ در کپ یے۔ یک جُستے ءِ پسہ ءَ واجہ براھمدگ ءَ بگٹی ءَ گُشتگ۔ کجام بلوچے کہ پنجاب ءُ دگہ ھنداں نِشتگ۔ آھاں اودا دومی راج ایردست نہ کُتگ اَنت۔ پنجاب ءِ سرا بمبارمنٹ نہ کُتگ۔ اگاں ناں شُما آھانی سرا ایٹم بم ھم کارمرز کُتگ اَت۔ ماں بلوچستان ءَ بلوچ ءِ کُشت ءُ کوش بیئگ اِنت۔ بلوچستان ءَ آس دیگ بوتگ۔ اے جاوراں کَس ادا بزنس ءُ کار ءُ بار کُت نہ کنت۔ بلوچ مالدار ءُ گِساں پاکی لشکر گوں ھیلی کاپٹر ءُ بمباں ماندارگ اِنت۔ پدا شُما گُشئے ما ادا سڑک ءُ دگ جوڑ کنیں، تاکہ بلوچ ءِ کُشت ءُ کوش ءِ کار ارزان بہ بیت۔ وھدیکہ کسے قبضہ گیریت ءِ کارانی دیم ءَ رکاوٹ بہ بیت تہ دھشت گرد نامینگ بیت۔ ڈاکٹر اللہ نظر دھشت کردی گُشگ بیت کہ آ بلوچ راجی پجار ءِ رکینگ ءِ جنگ ءَ کنگ اِنت ۔ بلوچ سلاہ بندیں جنگ کنگ ءَ نہ اِنت، بلکیں وتی راجی پجار ءُ دفاع ءِ جنگ ءَ کنگ اِنت، دھشت گرد پنجاب اِنت کہ مئے مال ءُ مڈیانی پُلگ ءُ برگ ءِ ھاترا مئے ڈگار ءِ سرا مئے کُشت ءُ کوش ءَ کنگ اِنت۔ مئے ورناھاں چِست کنگ ءُ ڈریل کنگ ءَ پد آھاں شھید کنگ اِنت ءُ آھانی ٹپ ءُٹوریں لاشاں چگل دیگ اِنت۔ پنجاب اے سرجمیں کاراں بلوچ مال ءُ مڈیانی پُلگ ءُ برگ ءِ ھاترا کنگ اِنت۔ ما وتی راجی دفاع ءِ جنگ ءَ کنگ ءَ اِنت۔

براھمدگ بگٹی ءَ گُشتگ کہ بلوچ راجی جُنز ءَ ھچ مُلک کمک کنگ ءَ نہ اِنت۔ بلے بلوچ وتی راجی پجار ءِ رکینگ ءَ کجام یک مُلکے ءِ مدت ءُ کمک ءَ وش اَتک کنت۔ انڈیا بہ بیت کہ اسرائیل یا امریکا۔۔۔۔۔