یو۔این۔او ءِ ٹیم ءَ سرجمیں راستی پیشدارگ بنت۔ نصراللہ بلوچ

بام: وائس فار بلوچ مسنگ فرسنز ءِ سروک واجہ نصراللہ بلوچ ءَ گُشتگ، یو۔این۔او ءِ ررکنگ گروپ ءَ ماں بلوچستان ءِ تر ءُ تاب ءِ وھد ءَ ماں بلوچستان ءَ گار ءُ بیگواھیں مردمانی بابت ءَ سرجمیں گواچن ءُ راستی پیشدارگ بنت، آئی ءَ امیت زاھر کنان ءَ گُشتگ، مارا اوست اِنت کہ یو۔این۔او ماں بلوچستان ءَ انسانی حقانی ھلاپ ورزی ءِ درگت ءَ وتی عملی کرداں پیلہ کنت۔  نصراللہ بلوچ ءَ گُشتگ بلوچستان شست ءُ چار سالیں کہ پاکی لشکر ءِ کھر ءُ گزبانی آماچ اِنت۔ بلے لھتے سال اِنت کہ ادا بلوچ پیر ءُ ورناھانی گار ءُ بیگواہ کنگ ءُ آھانی ٹپ ءُ ٹوریں لاشانی ماں ویرانیں جنگل ءُ دگانی دؤر دیگ ءِ تھا گیشی اَتکگ۔ ماں بلوچستان ءَ انسانی حقانی ھلاپ وارزی حد ءَ چہ گیش برجاہ اِنت۔ اے درگت ءَ عالمی مھلوک ءَ ماں بلوچستان ءَ انسانی حقانی ھلاپ ورزی ءِ سرا توار چست کنگی اِنت۔

آئی ءَ گُشتگ دُنیا ءِ کجام کُنڈ ءَ اگاں انسانی حقانی ھلاپ ورزی بہ بیت تہ اے درگت ءَ عالمی مھلوک ءُ انسانی گل توار چست کن اَنت۔ بلے ماں بلوچستان ءَ زلم ءُ زوراکی ءُ انسانی حقانی ھلاپ ورزی ءِ سرا کُل ھاموش اَنت۔ اے یک سوالیہ نشانے۔۔۔۔۔ آئی ءَ گُشتگ مئے کوشست برجاہ اَنت۔ یو۔این۔او ءِ ورکنگ گروپ ءِ ماں بلوچستان ءَ تر ءُ تاب ءِ وھد ءَ سرجمیں راستی دیم ءَ آرگ ءُ پیشدارگ بنت۔ ما ھمے واھگ ءَ داریں کہ یو۔این۔او ءِ ٹیم ”غیر جانبدار“ بیت ءُ آ ماں بلوچستان ءَ زلم ءُ زوراکی ءُ انسانی حقانی ھلاپ ورزی ءُ گاریں مردمانی درگت ءَ وتی  فرض ءَ پیلہ کنت۔

آئی ءَ گُشتگ گار ءُ بیگواھیں مردمانی سیاد ءُ وارثاں چہ یو۔این۔او ءِ ٹیم ءَ امید واراں، مارا امیت اِنت کہ یو۔این۔او ءِ ٹیم ایوک کوئٹہ ناں بلکیں سرجمیں بلوچستان ءِ ھنداں تر ءُ تاب کنت۔ ھمک ھند ءَ گار ءُ بیگواھیں مردمانی وارثاں گند ءُ نند کنت ءُ اے درگت ءَ پٹ ءُ پول کنت ءُ دُنیا ءَ بلوچ راج ءِ اصل جیڑھاں آگاہ کنت۔