کابل : امریکہ ءُ برٹش سیمسری ھنداں نوکیں ملکے جوڑ کنگ لوٹ اَنت ' لطیف پدرم

کابل : اوگان پارلیمان ء چَہ بدخشاں اُستان ءَ سیادی داروکیں باسک لطیف پدرم ءَ گْوشتگ کہ اوگانستان ءَ دھشت گردی ءِ ایرموشی ءَ جنگ کنوکیں امریکہ ءُ برٹش دمگ ءِ تہ ءَ نوکیں ملکے ءِ جوڑ کنگ ءِ جھد ءَ اَنت ۔ 

آئی ءَ گْوشتگ کہ نوکیں ملک پاکستانی دمگ گلگت بلتستان ، اوگان اُستان بدخشاں ، تاجکستان ءُ چین ءِ سیمسری ھندانی سر ءَ جوڑ کنگ بیت۔ لطیف پدرم ءَ گّوشتگ کہ دوئیں میان اُستمانی واک پہ نوکلیں ریاست ءِ جوڑ کنگ ءَ چَہ بازیں سال ءَ جھد ءَ اَنت ۔ 

چَہ بدخشاں ءَ سیادی داروکیں دگہ جنین آدمیں باسک فوزیہ کوفی ءِ اے رِد ءَ گْوشگ اَت کہ دمگ ءَ ریشم دگ ءِ جوڑ کنگ ھم ھمے شوربندی ءِ بھر اِنت ۔ بدخشان ءُ تاجکستان ءِ نگیگیں جاورانی سبب ءَ اے دگ ءِ کار اُوشتاتگ بلے نوکیں ملک ءِ جوڑ کنگ امریکہ ءُ برٹش ءِ شوربندیانی تہ ءَ ھوار اِنت ۔ دومی نیمگ ءَ اوگانستان ءَ امریکی سفارتجاہ ءَ اے بھتام رَد کرتگ ۔