جاور ھال جوانی ءِ نیمگ ءَ پیداک اَنت۔ جنگ ءِ آسر بئیگ ءَ وھد درکار اِنت، بشارالاسد

بام: شامی صدر بشارالاسد ءَ ھندی ٹی۔وی ”الدُنیا“ ءَ ھالتران کنان ءَ گُشتگ کہ جاور ھال جوانی ءِ نیمگ ءَ پیداک اَنت ءُ زوت جنگ آسر ءَ سربیت۔ ماں شام ءَ ”بفر زون‘‘ ءِ برجمی ءِ بابت ءَ آئی ءَ تران کنان ءَ گُشتگ کہ چُشیں گپاں ھچ وڑیں راستی نیست ءُ جنگ ءِ کَٹگ ءَ کمے وھد درکار اِنت۔

آئی ءَ گُشتگ کہ آ ماں دمشق ءَ صدارتی کارگس ءَ جاھمنند اِنت ۔ شامی فوج تھی ءُ ڈنی دُشمنانی گُما جنگ اِنت ءُ لھتے وھدانی تھا مارا سوب مندی رسیت۔ بلے جنگ آسر بئیگ ءَ وھد پکار اِنت۔ ڈکٹیٹر بشار ءَ وتی پلہ مرزیں لشکر ءِ ستاہ کنان ءَ گُشتگ کہ شامی فوج گوں تمردی ءَ اسلامی ناشرکاراں دیم پہ دیم اِنت ءُ آئی ءَ شامی راج پیشڈاہ کُتگ کہ ملک ءِ قسمت شامی الس ءِ دست ءَ اِنت۔ 

وھدیکہ ترکی چہ شام ءَ جنگ ءُ بجنگانی آسرا پناھگیریں مھلوک ءِ دیم داشتگ ءُ پر آھاں ترکی ءِ سیمسر بند کُتگ اَنت۔ ترکی ءِ سرکار ءَ گُشتگ، پہ شام ءِ مھلوک ءِ ھاترا درملکی نگھپانی ءَ ماں شام ءِ تھا کیمپ جوڑ کنگ بہ بنت، فرانس ءَ ھم ترکی ءِ اے سلاہ ءِ پلہ مرزی کُتگ۔۔ ترکی ءَ گُشتگ پہ شام ءِ پناھگیرانی ھاترا یو۔این۔او ءِ چیردستی ءَ ماں شام ءَ کیمپ ٹھینگ بہ بنت۔

دومی نیمگ ءَ رسانکی ھالانی  ردا ماں دمشق ءِ کش ءُ گوراں بشار لشکر ءِ بمب گواری ءَ صد ءَ چہ گیش مردم بیران بیتگ اَنت۔ شام ءِ بازیں ھنداں آشوبی یاگی ءُ بشار لشکر ءِ میان ءَ جنگ ءُ چوپ برجاہ اِنت۔ بشار ءِ پلہ مرزیں لشکر یاگیانی ھلاپ ءَ ٹوھیں سلاہ ، ھیلی کاپٹر ءُ جنگی گراب کارمرز کنگ اِنت۔ چر ایشی ءَ چہ لس مھلوک بیران بیتگ اَنت۔ 

بشار سرکار ءُ لشکر ءِ بازیں باسک ءُ کارندہ چہ بشار سرکار ءَ دزکش بیتگ اَنت ءُ آھاں یاگیانی پلہ مرزی ءِ جار جتگ۔ یاگیانی ردا آھانی جنگ ڈکٹیٹر بشار لشکر ءِ ھلاپ ءَ یکشلا برجاہ اِنت ءُ بازیں جاھاں آشوبی یاگیاں سوب مندی رَستگ۔