ایرانی ملا آیت اللہ حامنہ ای ءَ بشار سرکار ءِ ھلاپکارانی ھلاپ ءَ جنگ ءِ فتویٰ داتگ۔ ٹیلی گراف

بام: برطانوی ھالتاک ”ٹیلی گراف“ ءَ مغربی انٹلیجنس ءِ نشون ءَ ھمے پدرائی کُتگ کہ ایرانی ملا آیت اللہ حامنہ ای ءَ یاگی ءُ بشار لشکر ءِ ھلاپ ءَ جنگ کنوک ءُ یاگیانی پلہ مرزانی ھلاپ ءَ جنگ کنگ ءِ فتویٰ داتگ۔ ٹیلی گراف ءِ ردا آیت اللہ حامنہ ای ءَ پاسداران انقلاب ءِ چیریں فورس ”القدس“ ءَ ھمے کار دست ءَ داتگ ءُ گُشتگ کہ بشار لشکر ءِ ھلاپ ءَ یاگیانی جنگ، آھانی پلہ مرزی ایران ءِ سلامتی ءِ سرا ارش ءِ برابر اِنت۔ ھر وڑا بشار لشکر رکینگی اِنت ءُ ھلاپ کار ءُ آھانی پلہ مرزی کنوکانی ھلاپ ءَ جنگ کنگی اِنت۔

ھالانی ردا قومی سلامتی کمیٹی ءِ مراگش ءَ ملا آیت اللہ حامنہ ای ءِ سروکے ءَ رپورٹے تیار کنگ بوتگ ءُ رپورٹ ءَ بشار سرکار ءِ سرا یو۔این۔او ءِ جتگیں مالی پابندیان ءَ ایرجنان ءَ گُشتگ کہ بشار سرکار ءِ کمک ھروڑا جاری دارگی اِنت۔ رپورٹ ءَ گُشگ بیتگ بشار سرکار ءِ ھلاپ ءَ کار کنگ ءُ یاگیانی پلہ مرزی ایران ءِ نپانی ھلاپ اِنت۔  ایشی ءَ چہ ایران ءِ قومی سلامتی ءِ سرا اثر کپ اَنت۔ ایران  بشار سرکار ءِ کمک ءَ ھژدری زانت۔

 ماں سوریہ ءَ بشار سرکار اے ھنداں پہ ایران ءَ ”ریڈ لاین“ ءِ بستار ءَ داریت۔ 

ایران وتی نپانی ھاترا ھروڑا بشار سرکار ءِ پلہ مرزی ءَ کنت۔ حامنہ ای ءَ امریکہ، برطانیہ ءُ سعودی عرب ءُ قطر ءُ یاگیانی پلہ مرزی کنوکیں ملکاں ڈاہ داتگ کہ بشار سرکار ءِ ھلاپ ءَ کار کنگ پہ آھاں ھچ وڑا سیت مند نہ بیت۔ ملا آیت اللہ حامنہ ای ءَ القدس ءِ سروک قاسم سلیمانی ءَ پیشڈاہ کُتگ ءُ گُشتگ کہ پہ بشار لشکر ءِ رکینگ ءَ وتی لانک ءَ بہ بند اِت ءُ بشار لشکر ءِ ھلاپ کاریں ملکانی نپانی سرا اُرش کنگ بہ بیت۔