اگاں ”کیمیائی سلاھانی“ کارمرزگ ءِ شبین بہ رسیت، تہ شامی فوج ءِ ھلاپ ءَ کاروائی ھژدری اِنت، صدر اوباما

بام: امریکا ءِ سرکماش واجہ بارک اوباما ءَ شامی صدر بشارالاسد ءَ بیھار دیان ءَ گُشتگ، اگاں شام ءَ آشوبیانی ھلاپ ءَ ”کیمیائی سلاہ“ کارمرزگ بہ بنت، تہ امریکی فوج شامی فوج ءِ ھلاپ ءَ کاروائی کنت۔ چہ امریکا ءِ نیمگ ءَ شام ءِ بابت ءَ اے ترند تریں بیان زانگ بیت۔ وھدیکہ امریکا ءِ اے بیان انچیں وھدی ءَ دیم ءَ اَتکگ کہ یو۔این۔او ءِ ٹپاسکار ماں شام ءَ ایمنی ءِ برجم دارگ ءَ بے سوبی ءَ پد واپش گَشتگ اَنت۔

 

بارک اوباما ءَ مرچی ماں وائٹ ھاؤس ءَ تران کنان ءَ گُشتگ کہ اگاں شامی فوج ءِ نیمگ ءَ کیمیائی سلاھانی  کارمرزگ ءِ شبین بہ رسیت تہ جاور ھال یکدم نوکیں دروشمی زُرت کن اَنت۔ بارک اوباما ءَ گُشتگ کہ دنیگہ امریکا ءَ شام ءِ ھلاپ ءَ فوجی ارش ءِ ھچ وڑیں شور بندی نہ کُتگ۔ بلے امریکا ءَ شام ءِ جاورھالان گوں شیواری ءَ چارگ اِنت۔