تربت : بی آر پی ءُ بی آر ایس او ءِ یازدہ اگست ءَ سساتْرانی دیوان

تربت : چَہ بی آر پی ءُ بی آر ایس او ءِ نیمگ ءَ تربت ءِ یک ھالے ءَ یازدہ اگست ءُ راج زْرمبش ءِ سر ھال ءَ یک سسا تْرانی دیوانے بوتگ ۔
سسا تْرانی دیوان ءَ راھشوناں تْران کنان ءَ گْوشتگ کہ ریاست ءَ مئے آجوئی پُل اِتگ ءُ دروگ ءُ راست ودی کرتگ اَنت ۔
آھاں گْوشتگ کہ یازدہ اگست مارا تْرانگ ءَ پرین اِیت کہ بلوچستان یک آجوئیں ریاستے بوتگ ءُ پاکستان ءَ پہ زور گیپتگ ۔
آھاں گْوشتگ کہ بلوچستان ءِ زورگرگ بلوچیت ءِ ایرموشی اِنت یک آزادی ریاستے ءِ زورگرگ جھانی ءُ انسانی راھبندانی سرگْوز کنگ اِنت ۔
یازدہ اگست بلوچاں دائم ھمے یات ءَ دنت کہ بلوچ یک راجے ، آئی ءِ جتائیں پجارے ءُ جتائیں نامے کہ آئی ءِ گوں پاکستان ءَ ھوار کنگ سکیں مزنیں ناروائی یے ۔راھشوناں گْوشتگ کہ آزادی یک جوزگے کہ ابرم ءَ ھوار اِنت ءُ اے آجوئی اِنت کہ پہ ایشی ءَ مردم وتی سرانی دیمونی ءَ دیگ ءَ اَنت ۔
آھاں گْوشتگ کہ لھتیں ناسرپد گْوش اِیت کہ اے مروچیگیں جنگ اِنت بلے ما گْوش اِیں کہ اے ھما روچیگیں جنگ اِنت کہ بلوچ ءَ پہ زورگرانی دارگ ءَ تپنگ چست کرتگ اے جنگ چَہ ھما روچ ءَ بنا اِنت کہ ھمل جیھند ءَ پرتگیزی اُرشی جتگ ءُ تاچینتگ اَنت ، بلوچ ءِ گوں زورگراں جنگ ءِ یک مزنیں دپترے ھست داں ھمل کلمتی ءَ بہ گر مروچی اے جنگ برجاہ اِنت ۔
البت مروچی یک بدلی یے اَتکگ مروچی وانندھیں بلوچ غلامی ءُ آزادی ءَ جوانی ءَ زانگ ءَ اَنت ۔ اے جنگ مروچیگیں جنگے نہ اِنت بلوچ راجدپتر ءَ بہ وان گوک پروش ءِ جنگ درونت اِنت کہ زورگرانی دیم ءَ چنت سرانی دیمونی دیگ بوتگ ۔ شش سد سال پیسر ءَ کلمت ءِ تیاب ءَ ھمل جیھند ءَ دیمونی داتگ ءُ دپتر زندگ کرتگ ءُ مروچی بیست ءُ یکمی کرن ءَ ھمے تیاب دپ ءَ احمدداد ءِ دْروشم ءَ ھمل جیھند ءِ دپتر زندگ دارگ بوتگ ، احمد داد ءِ پاکیں میت ھمے دمگ بسول ءَ دست کپتگ ، چَہ ایشی ءَ ما زان اِیں کہ بلوچ پہ وتی راج ءُ آزادیں گلزمین ءَ ھرچ رنگیں دیمونی دات کنت ۔