اٹک، پاکی ایئر بیس ءِ سرا اُرش، دوئیں نیمگاں تیرگواری ءِ رد برجاہ

بام: ناشناسیں ارش کاراں کامرہ ایئربیس ءِ سرا اُرش کُتگ۔ دوئیں نیمگاں بمب ءُ تیرگواری ءِ رد برجاہ اِنت۔  دوئیں نیمگاں چہ تیرگواری ءَ چہ بازیں جانی ءُ مالی تاوان ءِ گپ دیم ءَ آیگ اِنت۔  ھندی ھالانی ردا ارش ءِ دیمگیری ءِ ھاترا پاکی فوج کمک لوٹائینگ بوتگ ءُ ترپل ون بریگیڈ کامرہ ءَ سر بوتگ۔

ایئربیس ءَ سی ءَ چہ گیش جنگی گراب ھست اَنت۔  دوئیں نیمگاں جنگ جاری اِنت ءُ ترندیں توار اِش کنگ بئیگ اِنت۔  مرچی شپ ءِ دو نیم ءَ ناشناسیں مردماں گوں راکٹ ءُ دستی بمباں کامرہ ایئربیس ءِ سرا اُرش کُتگ ءُ ارش کار بیس ءِ تھا پترگ ءَ سوبمند بیتگ اَنت۔ 

دنیگہ ارش کار ءُ پاکی لشکر ءِ میان ءَ دو پہ دوئی جنگ جاری اِنت۔ پاکی لشکر ءِ گُشگ ءِ رد ءَ ارش مھران ایئربیس ءِ وڑیں ارشے ءُ ایشی ءِ مول ءُ مراد پاکی گرابانی تاوان دیگ اِنت۔