مچ ءِ ھمگْوریں دمگ ءَ پاکستانی لشکریانی گوں گن شپاں بم ءُ تیرگْواری

شال : بلوچ ھیومین رائٹس آرگنائزیشن ءِ جارکش ءَ وتی بیان ءِ تہ ءَ گْوشتگ کہ گْوستگیں روچ ءَ پاکستانی لشکریانی مچ ءِ ھمگْوریں  دمگ زرگون کلی ، ماروڈھ ءُ مارگٹ ءَ آبادی ءِ سر ءَ بم گْواری ءُ لشکرکشی انسانی حقانی لگتمالی ءِ بدتریں درور اِنت ۔ 

دوشمبے ءِ روچ ءَ سھب ءِ سر ءَ مچ ءِ ھمگْوریں دمگ پاکستانی لشکریاں چاریں نیمگ ءَ انگیر کرتگ ءُ گوں نوکتریں سلاہ ءُ سازانی پجیگ ءَ گن شپ ہیلی کاپٹراں آبادیانی سر ءَ بم گْواری بنا کرتگ چَہ ایشی ءَ مزنیں کساسے ءَ دلوت مرتگ ۔

چَہ پاکستانی لشکریانی بم گْواری ءَ بازیں جنین آدم ، چک ءُ کماش ٹپی بوتگ ۔ دمگ ءِ انگیری ءِ سبب ءَ ٹپی ھسپتال ءَ برگ نہ بوگ ءَ اَنت پمیشکا بازیں ٹپیانی ءِ مِرگ ءِ تْرس اِنت ۔ 

بم گْواری ءُ تیر گْواری ءَ پد لشکریاں لُٹ پل ءَ پد لوگ آس داتگ اَنت لشکرکشی ءِ میان ءَ باز دزگیر کنگ ءُ بے ڈسیں جاھاں برگ بوتگ ۔

بلوچ ھیومین رائٹس آرگنائزیشن ءِ بیان ءِ رِد ءَ لھتیں روچ پیسر ءَ لشکریاں پہ زر آوارجنی ءِ بھتام ءِ سر ءَ اسپلنجی گابو ءِ دمگ ءَ مزنیں کساسے ءَ لشکرکشی کرتگ چَہ زورگرانی پیشگیں لشکرکشی ءَ ھپت بلوچ پسگ شھید ءُ باز ٹپی بوتگ ۔ نوں پاکستانی لشکری وتی زور ءَ گیش کنان اَنت ۔

بلوچ ھیومین رائٹس آرگنائزیشن ءِ گْوشگ اِنت کہ بلوچستان ءَ انسانی حقانی لگتمالی روچ پہ روچ گیش بوان اِنت پہ زور گار ءُ بیگواہ کنگ ، دیم شریتگیں میتانی دزکپگ ، نشانگ بندگ ءُ شھید کنگ ءِ پجیگ ءَ نوں لشکری بلوچ آبادیانی سرءَ یکشل ءَ اُرش ءُ بم گْواری کنگ ءَ اَنت ۔ 

جارکش ءَ گْوشتگ کہ پاکستانی لشکری ءُ چیریں ادارہ انسانی حقانی لگتمالی ءُ بلوچ چکچینی ءِ کارپداں چَہ دنیا ءِ دیم ءَ چیر دئیگ ءَ ھمروچ نوکیں پندل کنگ ءَ اَنت داں دنیا ریپینگ بہ بیت ۔ بلوچستان ءَ ھچ رنگیں انسانی حقانی پابندی گندگ نہ بیت ۔