شال : بانک نوشین کمبرانی ءِ لوگ ءِ سر ءَ پاکستانی لشکر ءِ بیڑ

زورگریں لشکر ءِ کارنندھاں بانک نوشین ءِ مات ھم جتگ ءُ لوگ ءِ نگھوان  لٹ ، تپنگی کنداک ءُ لگت ءَ گوں مان بستگ ءُ الکاپ چوپ کرتگ ۔ 

پاکستانی لشکریاں جنین آدم ءُ زھک ھم جتگ ءُ زاہ بد کرتگ اَنت ۔ چَہ بانک نوشین ءِ نیمگ ءَ رستگیں ھالانی رِد ءَ '' پاکستانی سپاھیگاں آئی ءِ جند ءُ چکانی کشگ ءِ بیھار داتگ ۔''

 بانک نوشین کمبرانی بلوچی ءِ نامی ئیں لچہ کار ءُ چاگردی جھدکارے ، بانک بلوچی زبان ءِ دانشورءُ نوشتہ کار نادرکمبرانی ءِ جنک اِنت ۔ واجہ نادر کمبرانی ھم وتی راجدوستیں لیکوانی سبب ءَ بلوچ چاگرد ءَ شرپمندیں بستارے ءِ واھند اِنت ۔ واجہ نادر کمبرانی ءَ چَہ پاکستانی صدر ءِ نیمگ ءَ رستگیں صدارتی داد پاکستانی مشرف رجیم ءِ باریگ ءَ بلوچستان ءِ سر ءَ بیوکیں جبر ءُ زوراکانی سر ءَ زھرشانی ءِ دْرشان ءَ پد داتگ ۔

زانگ بہ بیت کہ چد ءُ پیش ھم پاکستانی زورگریں لشکر ءُ سرکار ءِ نیمگ ءَ بانک نوشین کمبرانی ءِ ایرجنگ ءُ آئی ءِ پہ بلوچ ءِ سوتاں چست ءُ کرتگیں گامگیجانی دارگ ءَ ھمے رنگیں کار کنگ بوتگ ۔

سال دوھزار ھشت ءَ ساوتھ ایشین پارٹنر شپ پروگرام نامیں این جی اوزے ءَ گوں ھمبستگی ءِ میان ءَ بانک ءِ ایرموشی ءُ تْرسینگ ءَ چَہ پاکستانی سرکار ءِ نیمگ ءَ پندل کنگ بوتگ ۔ اے پندل ، بیھار ءُ بیڑ ءِ سبب بانک ءِ گوں بلوچ چاگرد ءَ مھکمیں ھمبستگی ءُ پہ بلوچ ءِ سوتاں کار کنگ اَت ۔ 

  ھما وھدی ھم بانک ءِ خلاف ءَ پنجابیاں وتی ناوشی دْرشانتگ وھدے کہ بانک ءَ پنجاب ءِ بنجاھی شھر لاھور ءَ پہ بلوچ ورناھاں چاگردی تک ءَ ھیلکاری برنامھے اڈ داتگ  اَت، لاھور ءَ این جی اوز ءِ پنجابی باسکاں آئی ءِ بلوچ ءِ گد ءُ پچانی سر ءَ ھم ملنڈ کرتگ ۔

ھمے این جی اوز ءِ  پنجابی کارمنندہ پاکستانی ایجنسیاں نمدی نوشتگ کہ بانک نوشین بی ایل اے ءِ کمانڈرے ءِ بستار ءَ این جی اوز ءِ زر ءُ مڈیاں پہ بی ایل ءَ کاربندگ ءَ اِنت ۔

پاکستانی ایجنسی ءِ مزنیں اُگدہ دارے ءَ ھمے پنجابیانی ھبر ءِ سر ءَ یک نمدی پہ آئی ءَ دیم داتگ ، آئی ءَ تہ ءَ نوشتگ :'' ما زان اِیں کہ ترا کسانیں زھگے ھست  پمیشکا ماتے بہ بئے ، آشوبی یے مہ بئے ''

چَہ پاکستانی کارنندھانی نیمگ ءَ بانک نوشین کمبرانی ءِ لوگ ءِ سر ءَ بوتگیں اِے ارش ھم آئی ءِ پہ بلوچ ءِ سوت ءُ نپاں چست کرتگیں گامگیجانی دارگ ءَ گْوستگیں کارپدانی دْرچ زانگ بوگ ءَ اِنت ۔