شال:پہ آواریں مردماں بستگیں شد گدان ءَ ھشت سد ءُ پنجاہ روچ سرجم ' بی این ایم مشکے ءِ ھمدردی

شال : پاکی سرکار ءِ آوار جتگیں مردمانی دراھی ءَ بستگیں شدکشیں گدان ءَ ھشت سد ءُ پنجاہ روچ سرجم بوتگ ۔

بی این ایم مشکے ھنکین ءِ لھتیں جھد کاراں شدکشیں گدان ءِ تہ ءَ گوں آواریں بلوچانی کھولاں ھمدرری دْرشانتگ ءُ گْوشتگ کہ زورگریں ریاست بلوچ راج ءَ چَہ زمین ءِ دلبند ءَ ولگْوج کنگ لوٹ اِیت زورگیپتگیں بلوچستان ءِ کنڈے پشت نہ کپتگ کہ آ اُود ءَ ریاست ءِ زورگرانی لشکری زور ءَ مہ بنت ۔

بلوچستان ءِ کنڈے ءَ ھم اگاں پہ آھاں کسانیں نہ وشیں توارے چست بہ بیت آ پہ بیر گرگ ءَ بلوچستان ءَ سرچ آپریشن ءِ نام ءَ بلوچانی چادر ءُ دیوال ءَ سر گْوز اَنت ءُ اے آھانی ھمروچگیں کار اِنت ءُ آپریشن ءِ نام ءِ سر ءَ سدھاں بلوچ آوار جنگ ءُ بیگواہ کنگ بوتگ ۔ پاکستانی ایجنسیانی بیر ءِ نشانگ بوگ ءَ پد ھم تپاک راجیں گل وتی اخلاقی ذمہ واریاں شموشتگ ءُ سیل چاروک جوڑ اِنت ۔ چَہ بلوچستان ءَ ھزارھانی کساس ءَ بیگواھیں دزگیر ناں دھشت گرد اَنت ءُ ناں ملامکار بلکیں آ جنگی دزگیر اَنت ۔ میان اُستمان زورگریں ریاست پاکستان ءِ سر ءَ زور بہ دنت کہ آ بلوچ بیگواھیں دزگیراں جنگی دزگیر ءِ بستار بہ دنت ۔

آواریں بلوچانی کھولاں گْوشتگ کہ پاکستانی آمیدگس ءِ آجوئی ءِ مزنیں ڈاہ ءُ گپانی ٹپاسگ ءَ پہ وتی دوستانی بیگواھی ءِ درگت ءَ آمیدگس ءِ دروازگ ٹک اِتگ ، چَہ آھاں ایوک دو مھیمیں کیس جلیل ریکی ، علی اصغر بنگلزئی ءِ نام گرگ کرز اَنت کہ گْواچن بوگ ءَ ابید ھم آمیدگس ءَ جلیل ریکی ءُ علی اصغر بنگلزئی ءِ پجیگ ءَ ھزارھاں بیگواھیں دزگیرانی دراجیں بیگواھی ءُ سدھاں بلوچ دزگیرانی زندان ءِ تہ ءَ کوش ءِ سر ءَ پاکستانی آمیدگس ءِ بے تواری آئی ءِ ڈاھانی پاشک کنگ ءَ بس اَنت ۔