حلب ءُ ادلب ءَ جنگ جاری، بشار لشکر ءِ یک ءُ پنجاہ کارندہ یاگیاں دزگیر کُتگ اَنت۔

مزن ھور: رسانکی ھالانی ردا شام ءِ استان حلب ءُ ادلب ءَ بشار لشکر ءُ آشوبی یاگیانی میان ءَ جنگ گوں تُرندی ءَ جاری اِنت ءُ بشار لشکر ءِ یک صد ءُ پنجاہ کارندہ یاگیاں دزگیر کُتگ اَنت۔ انسانی حقانی گلے ءِ ردا شام ءِ استان ”ادلب” ءِ دمگ ”معرۃ النعمان” ءَ یاگیاں چاردہ افسراں ھوار بشار لشکر ءِ پنجاہ کارندہ گوں سلاھاں آوار جتگ ءُ دزگیر کُتگ اَنت۔انسانی حقانی کارندھے ءِ ردا معرۃ النعمان ءَ بشار لشکر ءُ یاگیانی میان ءَ دوازدہ ساھت ءِ جنگ ءُ بجنگاں پد یاگیاں بشار لشکر ءِ یک فوجی بُنجلے پروشتگ ءُ تباہ کُتگ ءُ پنجاہ کارندہ دزگیر کُتگ اَنت۔

دومی نیمگ ءَ شام ءِ شمالی شھر حلب ءَ یاگی ءُ بشار لشکر ءِ میان ءَ جنگ ءُ چوپاں پد یاگیاں یک صد فوجی دزگیر کُتگ۔ یاگیاں دزگیر بیتگیں کارندھانی ویڈیو ھم شِنگ کُتگ۔ دز گیر بیتگیں کارندھاں یک بشار سرکار ءِ کرنلے ”کرنل محمد رشید محمد المہمید” ھم ھوار اِنت

شھرحلب ءَ بشار لشکر ءُ یاگیانی میان ءَ جنگ یکشلا برجاہ اِنت ءُ دوئیں نیمگاں جانی ءُ مالی تاوان ءِ ھال سر بیئگ اِنت۔ بلے راستیں گپ دیم ءَ نیاتکگ کہ گوستگیں شپ ءَ مُرتگینانی کچ چِنچوک اِنت۔