شامی زالبول پارلیمانی باسک ”اخلاص بدوی” چہ اُگدہ ءَ دزکش بوتگ

شام:ھالانی ردا بشارالاسد ءِ پلہ مرزیں پارلیمانی زالبول باسک اخلاص بدوی چہ اگدہ ءَ دزکش بوتگ۔ ترکی ءِ سربیئگ ءَ گوں آئی ءَ چہ بشار سرکار ءَ دزکشی ءِ جار جنان ءَ گُشتگ کہ بشار لشکر ءِ رستری کِرد ءُ لس مھلوک ءِ سرا زُلم ءُ زوراکی منی سگ ءُ اوپار ءَ ڈن اَنت ءُ من لاچار بوتگ اَنت کہ چہ اگدہ ءَ دزکش بہ باں۔ آئی ءَ گُشتگ شام ءِ مھلوک ءَ بنکی حق رسگ ءَ نیاں۔

اخلاص بدوی پوریاگر ءُ محنت کشانی سیٹ ءِ سرا پارلیمنٹ ءِ باسکے ءِ ھاترا گچین کنگ بوتگ ءُ آ سُنّی مسلمانے ءُ سرکاری البعث گل ءِ ھم ممبرے۔

بانک اخلاص بدوی ءَ پیش دگہ بازیں سرکاری باسک چہ بشار سرکار ءَ دز کش بیتگ اَنت کہ آھانی تھا ماں عراق ءَ شام ءِ سفیر ”نواف الفارس، میجر جنرل مناف طلاس ءُ دگہ بازیں بشارالاسد ءُ نزیکیں دوست ءُ سنگت ھوار اَنت۔