پارس ء مزن ھور' امریکی گُراب ءِ ھژوک ءِ سر ءَ تیرگْواری

ایسوسی ایٹڈ پریس ءِ رِد ءَ یک امریکای آپی گْرابے ءَ  ماں پارس ءِ مزن ھور ءَ امارت ءِ نزدیک ءَ یک ھژوکے ءِ سر ءَ تیرگْواری کرتگ ۔امریکہ ءِ یک مزنیں اُگدھداری ءَ گوں بی بی سی ءَ گْوشتگ امریکی آپی گْراب یو ایس این ایس راپاھینک ءَ یک ھژوکے ءِ سر ءَ ھما وھدی تیرگْواری کرتگ کہ باز رند ءَ ھژدار دیگ ءَ پد ھم آ گوں تْرندی امریکی آپی گْراب ءِ نیم ءَ آھان بوتگ ۔ 

امریکی ھالرسان اے پی ءِ رِد ءَ چَہ تیرگواری ءَ یکے مرتگ ءُ سئے ٹپی بوتگ ۔ فرانسیسی ھالرسانے ءِ رِد ءَ نشانگ بوتگیں ھژوک انچائیں مردمے ءِ بوتگ کہ سئے موٹری ءُ نومیٹر دْراج اَنت ءُ ھما ھژوکانی چھرگ جنت کہ ھمے دمگاں ماھیگ کشگ ءَ کارمرد بنت ۔ ھمے ھالرسان ءِ رِد ءَ ایرانی سپاہ ء پاسداران ء انقلاب ھم تیز ءُ چَہ ایشاں گْونڈتریں ھژوک کارمرد کنت ۔ 

یک اماراتی کمکارے  ءَ ھم یک مردمے ءِ بیرانی ءِ ھال راست گْوشتگ ۔ ھالرساں رائیٹرز ءِ رِد ءَ چَہ تیرگْواری ءَ  پیش امریکائی گْراب ءِ مردماں ھژوک ءَ ھژدار داتگ کہ سک نزیک ءَ رستگ اَت ۔

وائس آف امریکہ پرشین سروس ءِ رِد ءَ امریکی بوجیگ ءُ گْراب چَہ میان اُستمانی زِر ءَ فارس ءِ مزن ھور ءَ گْوز اَنت ۔ سپاہ پاسدران ایران ءَ ھمسبتگیں تیزروکیں ھژوکانی سیمسرءِ نزیک بوگ ءِ سبب ءَ ، امریکائیاں باھند کرتگ ءُ اے درگت ءَ شیوار تر بوتگ اَنت ۔امریکائیانی بیم کپگ ءِ یک سببے گْوستگیں روچاں چَہ ایران ءِ نیمگ ءَ امریکہ ءِ پابندیانی پسو ءَ ھرمز ءِ تنگدپ ءِ بند کنگ ءِ بیھار اِنت چَہ ایشی ءَ پد دمگ ءِ تہ ءَ گر ءُ چیل ءِ جاور گیش بیان اِنت ۔