گوادر : رُگ گْوازگ ، روزگار ءُ شاتکامی دزگٹی

گوادر : ماھیگ گوں ماھور ءَ ھم گْرگ بیت ءُ گوں چِردان ءَ ھم ، چِردان ءَ کنڈی ھم گْوش اَنت ۔ چِردانی ماھیگ ءِ ھرید چَہ 

ماھوری ماھیگ ءَ گیشتر اِنت پرچا کہ چِردانی ماھیگ تاجگے ءَ پاسار ءَ آرگ ءُ بھا کنگ بنت وھدے کہ ماھوری ماھیگ چَہ مِرگ ءَ پیش  چندیں کلاک ماھور ءِ تہ ءَ بنت ءُ کشگ ءَ پد داں روچے ءَ بہ گر سئے ماہ ءَ برف یا مزنیں لانچانی فریزراں ایر کنگ بنت ۔ پہ کنڈی کنگ ءَ المی اِنت ماھیگانی وراک کنڈی ءِ دپ ءَ دئیگ ءُ دور دئیگ بہ بیت مزنیں ماھیگانی دلپسندیں وراک کسانیں ماھیگ اَنت ۔ پہ دگہ ماھیگانی گْرگ ءَ کارمرد بیوکیں کسانیں ماھیگ گُوں رُگ ءَ گْرگ بنت ۔ رُگ گْوازگ ھرکسی وس ءِ کار نہ اِنت رُگ گْوازوکیں دریاورد زْرنگ ءُ تکڑاہ بنت ، گْرانیں رُگ ءِ کوپگ ءَ کنگ ءُ یک گچینی تکنیکے ءَ آپ ءِ سر بر ءَ آیوکیں ماھیگانی رَم ءِ سر ءَ انچوش دور دئیگ کہ یکجاہ مُچ مہ بیت بلکیں گْرد گْرد ءَ ماھیگانی سر ءَ بہ کپ اِیت ءُ آھاں واڑ ءَ بہ کنت  ءُ چَہ سد کلو ءَ برز وزنداریں رُگ ءِ کشگ ءَ گُشادی ھم لوٹ اِیت ۔ رُگ ءِ چمگ سک کسان اَنت گوں ایشاں  کسانیں ماھیگ پڈنی ، ٹانٹار ، مربوءُ شُر گْونگیں کسانیں ماھیگ ءَ ابید مدگ ، لوجر ءُ مشکو ھم گْرگ بیت ۔ باز کماشیں مید تیاب ءَ لانکے آپی ءَ ھم رُگ گْواز اَنت ءُ پہ ورگ ءَ کسانیں ماھیگ گْر اَنت ۔ گْوادر ، جیمڑی ، پشوکان ، سربندن ، پسنی ، اُورماڑہ ، ملیرکُنڈ ءُ دگہ بلوچستان ءِ تیابدپاں کماشیں میدانی پہ وھد ءِ گْوازینگ ءَ رُگ گْوازگ ھم یک شاتکامی [ تفریحی ] دزگٹی یے ۔