لشکریاں بازیں درانڈیھیں بلوچ آوار جتگ ءُ پہ ٹوھیں لشکرکشی ءَ لانک بستگ'بی آرپی

شال : بلوچ ری پبلکن پارٹی ءِ بنجاھی تْرامکاری مجلس ءِ جارکش شیر محمد بگٹی ءَ فیس بک ءَ داتگیں بیانے ءَ تہ ءَ گْوشتگ کہ زورگریں پاکستان ءِ لشکریاں بلوچستان ءَ مزنیں کساس ءَ گر ءُ دار ءُ بلوچانی ایرموشی ءَ پہ دگہ ٹوھیں لشکرکشی ءَ لانک بستگ ۔ اے لشکرکشی گچین پہ بلوچ درانڈیھانی گر ءُ دار ءَ بیت کہ مزنیں کساسے ءَ نہ گیگیں جاوراں بلوچستان ، سندھ ءُ پنجاب ءِ سیمسریں دمگاں اَدارکی کڈک ءُ گدانانی تہ ءَ لاچاری زند گْوازینگ ءَ اَنت ۔  پہ لشکرکشی ءَ ھمے جواز پیش کنگ بوگ ءَ اِنت کہ لشکرکشی بلوچ سرمچار ءُ دُز ءُ ڈنگانی دارگ  ءَ بیت بلے راستی اِیش اِنت کہ اے دمگاں بلوچ پراریانی ھچ رنگیں بنجل ءُ بندر نیست ۔ اے لشکرکشی ءِ ایوکیں مراد زورگریں ملک ءِ پُرشت پروش ، دھشت گردی ءُ بلوچاں چکچین کنگ ءِ کارپدانی  برجاہ دارگ اِنت ۔  زورگریں پاکستان ءِ لشکریانی شال ءَ بوتگیں یک دیوانے ءِ تہ ءَ سرکاری کارمنداں شَور کرتگ کہ مستونگ ءُ بولان ءِ دمگاں مزنیں کساسے ءَ لکشرکشی کنگ بیت ۔ آ اُود ءَ ھم مزنیں کساسے ءَ چَہ ڈیرہ بگٹی ءُ مریانی دمگ ءَ بلوچ پاکستانی لشکرکشی ءِ سبب ءَ لڈ اِتگ ءُ پچیں آزمان ءِ چیر ءَ جاھمنند اَنت ۔ 

شیر محمد بگٹی ءَ گمان درا کرتگ کہ چَہ پاکستانی لشکریانی شَور کرتگیں لشکرکشی ءَ مزنیں کساسے ءَ بلوچ دزگیر کنگ ءَ پد بیگواہ کنگ ءُ کشگ بنت ۔ آئی ءَ درور دیان گْوشتگ کہ ماھے پیسر ءَ ھم نوزدہ جون دوھزار دوازدہ ءَ پاکستانی لشکریاں رحیم یارخان ءَ  بلوچ درانڈیھ ءِ لوگے ءِ سر ءَ اُرش کرتگ ءُ اللہ بخش بگٹی ء میر خان بگٹی ءُ نبی دوست بگٹی ءُ ھیردین بگٹی گوں دگہ دوازدہ کساں آوار جتگ۔ آوار جتگینانی تہ ءَ زالبول ھم ھوار اَنت ۔ زالبولانی تہ ءَ یارخان بگٹی ءِ لوگبانک نازی بی بی ، ناھل خان بگٹی ءِ لوگبانک دُرھاتون ، علی ھان بگٹی ءِ لوگبانک شاہ بی بی ، میر حسین بگٹی ءِ لوگبانک بی بی ، نور حسین بگٹی ءِ لوگبانک سعیدہ ، قادرو بگٹی ءِ لوگبانک زرھاتون ، گاھرا بگٹی ءِ لوگبانک زرنی ءُ دگہ لھتیں مردین آوار جتگ کہ نام اِش نصیب اللہ بگٹی ء مرزا خان بگٹی ، اَرزو بگٹی ء قادرو بگٹی ، نادربگٹی ء نصیب اللہ بگٹی ، لیاقت بگٹی ء علی نواز بگٹی ءُ گوھال بگٹی ء لھنرا بگٹی ، اَنت۔  

بی آر پی ءِ جارکش ءَ گْوشتگ کہ اے سرجمیں جاور نہ اِنت بلکیں ایوک چندیں درور اَنت پاکستانی جبر ءُ زوراکی چَہ ایشی ءَ گیشتر اِنت۔ آئی ءَ گْوشتگ کہ چَہ درملک ءَ گچین امریکہ ءُ نیٹو ءِ نیمگ ءَ کمک ءِ رسگ ءَ پد پاکستان ءَ بلوچانی سر ءَ زوراکی ءُ کشت ءُ کشار گیش کرتگ ۔آئی ءِ لشکریاں شوربستگ کہ وتی کشت ءُ کشار ءَ گیشتر کنان بلوچستان ءُ ھرکجا کہ بلوچ جاھمنندیں ھمود ءَ سر بئے اِیں ءُ پنجاب ءُ سندھ ءِ تہ ءَ ھم نشتگیں بلوچانی کشگ ءِ ھبربندی اِش کرتگ۔ مروچی پاکستانی لشکریاں کراچی ءَ بلوچ آبادی ملیر ءَ اُرش کرتگ ءُ دو برات نادرعلی ھوت ءُ آصف علی ھوت آوار جتگ ، اے ھم آرت ءِ تہ ءَ واد ءَ ھسابیں درور اِنت چد ءُ پیش ھم ھزارھاں بلوچ کشگ ءُ بیگواہ کنگ بوتگ ۔

آئی ءَ گْوشتگ کہ ما مدام توار چست کرتگ کہ پاکستان دھشت گردی ءِ گر ءُ دار ءِ نام  ءَ رَسوکیں درملکی کمک ءَ شر کارمرد کنگ ءَ نہ اِنت ۔ ما پاکستان ءَ کمک دیوکیں ملکاں یک رندے پدا سرپد کنگ لوٹ اِیں کہ آھانی داتگیں کمک بزگ ءُ لگتمالیں بلوچانی چکچینی ءَ کاربندگ بوگ ءَ اَنت ۔ آئی ءَ گْوشتگ کہ پاکستان ءُ آئی ءِ اسٹبلشمنٹ دمگ ءِ ایمنی ءُ مھکمی ءَ یکشل ءَ تاوان دئیگ ءَ اَنت ۔ آ گوں وتی دھشت گردیاں اوگانستان ، ھندوستان ءُ دگہ ملکاں دزمانجنی کنگ ءَ اَنت ءُ آھانی دمگ ءِ تہ ءَ گوں ھریک دھشت گردی ءَ ھمبستگی ھست ۔

آئی ءَ میان اُستمانی تک ءَ آمیدگس ، انسانی حقانی پھریزکار، تپاکیں راجانی گل ، یورپی یونین ، امریکہ ءُ نیٹو ءَ گوں دزبندی کرتگ کہ آ دھشت گردانی ھمدستیں ملک پاکستان ءِ کمک ءَ بند بہ کن اَنت ۔