شام، بشار لشکر ءِ بمب گواری ءَ یک صد ءُ پانزدہ کس مُرتگ

 دمشق: شام ءِ شمالی شھر حلب ءُ دمشق ءَ بشار سرکار ءُ یاگیانی میان ءَ جنگ ءُ چوپ یک رندی پدا بندات بیتگ۔ رسانکی ھالانی ردا شام ءِ شھر ”حلب” ءَ بشار لشکر ءِ بمب گواری ءَ چہ یک صد ءُ پانزدہ مردم بیران بیتگ ءُ بازیں ٹپی اَنت۔ ادا شام ءِ شھر دمشق ءَ بشار لشکر ءِ تیرگواری ءُ بمب گواری ءِ آسرا دوازدہ مردم بیران بوتگاں کہ ایشانی تھا پنچ زھگ ھم ھوار اَنت۔ ھندی ھالانی ردا دمشق ءِ کش ءُ گوراں دہ روچ اِنت کہ بشار لشکر ءُ یاگیانی میان ءَ جنگ ءُ چوپ جاری اِنت۔ ”یلدا” ءَ بشار لشکر ءِ ترندیں بمب گواری ءَ چہ بازیں گِس پُرشتگ ءُ تباہ بیتگ اَنت ءُ مردم تُرس ءِ آماچ اَنت۔ یاگی ءُ بشار لشکر ءِ میان ءَ جنگ ءُ بجنگانی آسرا بازیں کس ٹپی اَنت کہ ٹپیانی نادراھجاھنی سر کنگ ءَ جنجال ودی بیتگ۔ ھالانی ردا شام ءِ شھر ”حلب” بشار لشکر ءَ انگِرّاں کُتگ ءُ چاریں نیمگاں لشکریانی کچ گیش بوان اِنت ، آدینگ ءِ روچ ءَ بشار لشکر ءُ یاگیانی میان ءَ مزنیں جنگ ءُ بجنگے ءِ گمان اَست اِنت۔ دومی نیمگ ءَ بشار سرکار ءِ دو ٹوھیں کارندہ چہ شامی سرکار ءَ دزکش بوتگ اَنت ءُ یاگیانی پلہ مرزی ءِ جار اِش جتگ۔