شام بشار لشکر ءِ بمب گواری جاری اِنت، صداں مردمانی مرگ ءِ گُمان

ھالانی ردا مرچی آدینگ ءِ روچ ءَ بشار لشکر ءِ گوں جنگی گُراب ءُ زمینی لشکر ءِ کمک ءَ یاگیانی بنجلانی سرا بمب گواری جاری اِنت۔ شام ءِ سرکار ءِ ھلاپ کارانی مستریں شھر ”الیپو” ءُ ”ادلیب” بشار لشکر ءِ زدا اَنت۔

مرچی بشار لشکر ءَ بازیں ھنداں گوں جنگی گُراب ءُ ھیلی کاپٹراں بمب گواری کُتگ کہ بازیں مردمانی بیرانی ءِ گمان زاھر کنگ بیئگ اِنت۔ بشار لشکر نوکیں ءُ وت کاریں سلاہ ھم کارمرز کنگ اِنت کہ گمان ھمیش اِنت کہ چر اے بمب گواری ءَ بازیں کس بیران بیتگ۔ دنیکہ ھرابیں جاورانی سوب ءَ مرتگیں مردمانی کچ زانگ بیئگ ءَ نہ اِنت،

انسانی حقانی گلے ءِ گُشگ ءِ ردا شام ءِ استان ”درعا” ءَ بشار لشکر ءَ گوں جنگی گراباں ارش کُتگ ءُ شھر ”ادلیب” ءَ یاگی ءُ بشار لشکر ءِ میان ءَ جنگ جاری اِنت۔

امریکی محکمہ حارجہ ءِ گُشگ ءِ ردا بشار سرکار مزنیں ھون ریچی ءِ ھاترا ساڑی گندگ ءَ آیگ اِنت۔