پشوکان : آوار جتگیں کامران علی ءِ لھتیں یاتگاریں اَکس ءُ ترانگ

کامران ء علی محمد ، 25 جولائی دوھزار دوازدہ ءَ پاکستانی ایجنسیاں چَہ پشوکان ءَ لیوزتھانہ ءَ ھمگور چَہ آئی ءِ لوگ ءَ اَدار دو ءُ سئے ءِ میان ءَ آوار جتگ ۔

کامران ء علی محمد ءِ سند ھپدہ سال اِنت ءُ آ میڑک ءِ نودربر اِنت ۔ کامران ءِ لوگ ءِ مردمانی گْوشگ اِنت کہ کامران ءِ ھچ رنگیں سیاسی ءُ دگہ چیریں گلاں سیادی نیست ۔

کامران سکیں نیزگاریں کھولے ءَ گوں سیادی دار اِیت آئی ءِ چَہ دربرجاہ ءِ اُستاداں یکے ءَ گوں بام ھال ءِ اھوالکارءَ گپ جنان گْوشتگ : '' کامران سکیں زانتکاریں نودربرے بلے چَہ نیزگاریں کھولے ءَ سیادی دار اِیت ءُ من مدام ھمے جیڑ اِتگ کہ کامران باریں چَہ وتی نیزگاری ءِ سبب ءَ دیمتر ءَ ونت کنت یا ناں ''

کامران ءِ داتگیں اَکس چَہ آئی ءِ اسکول ءِ سنگتاں یکجا کنگ بوتگ اَنت ۔ مستریں اَکس دربرجاھی چکاسے ءِ وھد ءَ کشگ بوتگ ، ھمے اَکس ءِ تہ ءَ کامران ءَ پہ چکاس ءَ گتہ گون اِنت ءُ اُوشتاتگ ، آدگہ اَکسانی تہ ءَ کسان سال گوں ھمگنگلاں گل ءُ شادان اِنت ۔

چَہ کامران ءِ آوار جنگ ءَ نہ ایوک ءَ آئی ءِ کھول بے تاھیر اِنت ، آئی ءِ ھم کلاس ، پشوکان ، گوادر ءُ سرجمیں بلوچستان ءَءِ مردم پہ بے تاھیری وداریگ اَنت کہ کسان سال چَہ پاکی لشکریانی دست ءَ سلامتی ءَ در بہ کپ اِیت ءُ یک رندے پد ءَ مئے میان ءَ گوں وتی ھمگنگلاں بہ مل اِیت ۔

بلوچ چاگرد ءَ اے ھم جیڑگ بوگ ءَ اِنت کہ ھپدہ سالی بچکے ءَ پہ وتی بیر ءِ دین ءَ برگ اگاں پاکستانی لشکریانی مزدگری [ انصاف ] اِنت گڑا چد ءُ مستریں نارروائی نیست ۔ بلے کامران اولی کسان سال نہ اِنت کہ پاکستانی لشکریاں آوار جتگ بلکیں سداں کسان سالیں بلوچ زھگ پاکستانی لشکریاں وتی بیرانی دین ءَ چَہ مات ءُ پتاں پُل اِتگ ، کامران بلوچ گلزمین ءِ چَہ ھما بچاں یکے۔