امریکا ءَ دو پاکستانی ءُ افغانی منی ایکسچینج کارگاہانی سرا پابندی جتگ

واشنگٹن: امریکا ءَ دو پاکستانی ءُ افغانی منی ایکسچینج کمپنیانی سرا پابندی جتگ۔ امریکی سرکار ءِ ردا اے دوئیں زر دیم دیوکیں کمپنی ”ایچ کے ایچ ایس” ءُ ”روشن منی ایکس چینج” طالبانانی مدت ءُ کمک ءَ او منشیات ءِ ھاترا زَر ءِ دیم دیگ ءَ ھوار اَنت۔ امریکی محکمہ خارجہ ءِ ردا منی ایکسچینجانی سروک حاجی عبدالستار بارکزئی ءُ حاجی خیر اللہ بارکزئی ءَ گوں طالباناں سنگتی است ءُ اے منی ایکسچینجانی کمک ءَ طالباناں ناشرکاری ءُ منشیات ءِ ھاترا زَر ءِ دیم دیگ ءَ کمک کن اَنت۔ امریکی سرکار ءِ ردا اے منی ایکسچیجانی کمک ءَ لکھاں ڈالرز طالباناں سر بوتگ۔ اے ردا امریکا ءَ  منی ایکسچینجانی سروک حاجی عبدالستار بارکزئی ءُ حاجی خیر اللہ بارکزئی  ءِ سرا ھم پابندی جتگ۔ اے کمپنیانی ماں دوبئی ، ایران، افغانستان ءُ پاکستان ءَ بازیں شاہ ءُ برانچ است اَنت۔