بلوچ راجی وتواکی ءِ منوگرانی لڑ گیش بیتگ، دوازدہ کانگریس ءِ باسکاں پلہ مرزی کُتگ۔ ڈیناروھرا باکر
Wednesday, March 28, 2012
بام: امریکی کانگریس ءِ باسک واجہ ڈینا روھرا باکر ءَ گوں کانگریسی باسک ”اسٹیوکنگ” ءُ ”لیو گومرٹ” ءِ ھمراھی ءَ پریس کانفرنس ءَ تران کنان ءَ گُشتگ کہ پاکستان ءُ امریکا ءِ میان ءَ سیادیانی پُرشت ءُ پروش ءَ ابئید ھم بلوچ راجی وتواکی ءِ پلہ مرزی ءَ کنیں۔ پاکستان امریکا ءِ ھلاپ ءَ جنگ کنوکیں ناشرکاراں کمک کنگ اِنت ءُ آھاں سلاہ پُجارینگ اِنت۔ روھرا باکر ءَ گُشتگ بلوچ راجی وتواکی ءِ پلہ مرزانی لڑ گیش بیئگ اِنت، پیش ءَ بس چار باسکاں پلہ مرزی کُتگ ءُ نوں منوگرانی لڑ دوازدہ ءَ سر بوتگ۔ آئی ءَ امیت زاھر کنان ءَ گُشتگ کہ مارا اوست اِنت کہ پلہ مرزانی کچ چد ءُ گیش بیت۔ آئی ءَ تران کنان ءَ گُشتگ کہ ماں امریکی کانگریس ءَ بلوچ راجی وتواکی ءِ حق ءَ گیشیں کچے ءَ پلہ مرزی ءِ رسگ ءَ وھد درکار اِنت، دانکہ دگہ بازیں باسک بلوچستان ءِ راجدپتری بستار ءَ پوہ بہ بنت۔ پیش ءَ ما ھم بلوچستان ءِ تاریخی بستار ءَ پوہ نہ بیتگ اِنت ءُ مارا بلوچستان ءِ بابت ءَ سرپدی نہ بیتگ۔ بلے رند ءَ بلوچستان ءِ جاورھالانی زانگ ءَ پد ما ھمے مارتگ کہ کُرداں ھوار بلوچ ءَ ھم راجی وتواکی ءِ حق ھست اِنت۔ آئی ءَ گُشتگ مرچیگیں روچ 27 مارچ ءَ بلوچستان ءِ راجدپتری بستار ھتم کنگ بیتگ ءُ پہ زور ایردست کنگ بیتگ۔۔۔
آئی ءَ نشوندھی کنان ءَ گُشتگ اگاں پاکستان اسلامی ناشرکارانی کمک ءُ مدت ءَ بند بہ کنت تہ ما پدا ھم بلوچ راجی وتواکی ءِ پلہ مرزی ءَ چہ دزکش نہ بئیں، آئی ءَ گُشتگ امریکا ءَ مارگ لوٹیت، ”سارتیں جنگ” ھلاس بیتگ، بلے پاکستان ترسناکیں رنگے ءَ دیم ءَ اَتکگ۔ بلوچ راج ءِ سرا پاکستان ءِ زلم ءُ زوراکی ءُ بلوچ راج ءِ چُک چینی ءِ کرد ھچ وڑا چیر دیگ نہ بنت۔ اے بابت ءَ کس دروگ بست نہ کنت۔ بلوچ راج ءِ سرا باز زُلم بیتگ ، آھاں آجوئیں مُلکے ءِ حق است اِنت۔ امریکا ءَ بلوچ راجی وتواکی ءِ پلہ مرزی کنگی اِنت۔ اے پہ امریکا ءَ سیت مند اِنت۔ او امریکا ءَ اے درگت ءَ کس میاربار کُت نہ کنت چیاکہ امریکا ءِ رھبندانی تھا ھر راج ءِ وتواکی ءِ پلہ مرزی کنگ المی اِنت۔
بنگپ:
گچینی ھال,
واشنگٹن
Comments[ 0 ]
Post a Comment