عالمی دُنیا پاکی استان ءِ نیمگ ءَ بلوچ چُک چینی (نسل کُشی) یے پالیسیانی دارگ ءِ ھاترا وتی جوانیں کرد ءَ پیلہ بہ کناں۔ شیر محمد بگٹی
Monday, January 30, 2012
کوئٹہ: بلوچ ری پبلیکن پارٹی یے آرگنائزنگ کمیٹی یے جارکش واجہ شیر محمد بگٹی ءَ ھالتران کنان ءَ گوشتگ کہ عالمی مھلوک ماں بلوچستان ءَ پاکی استان ءِ زلم ءُ زوراکی ءُ بلوچ چُک چینی یے توجیلانی دارگ ءِ ھاترا ایوک زبان ءِ کار بندگ ءَ ابئید بلکیں جوانیں عملی گامگیج بہ زور اَنت۔ پاکی استان ءِ نیمگ ءَ ماں بلوچستان ءَ لشکر کشی ءِ بند کنگ وتگڑ ءُ دروگیں گپے (بلوچستان ءَ فوجی آپریشن برجم ءُ جاری اِنت) تاکہ پاکی استان عالمی دُنیا ءِ چماں بند بہ کنت۔ بلکیں راستی دگرے۔ ماں بلوچستان ءَ استانی زُلم ءُ زوراکی برجم ءُ جاری اِنت۔ ماں ڈیرہ بگٹی ءَ استانی زالمیں فوج ءَ بلوچ گِساں مان داتگ ءُ زھگ ءَ زالبول جتگ ءَ شھید کتگ انت ءُ ”چادر ءُ چار دیواری” یے پادمالی کُتگ۔ ڈیرہ بُگٹی ءَ استانی وتگڑیں فوج ءَ بلوچ گساں مانداتگ ءُ ظفر میرل، مراد علی شاہ مراد، آئی ءِ برات ہیضو شاہ مراد، جمعہ شاہ مراد ءُ حمل بلوچ دزگیر کُتگ اَنت ءُ گوں وت بُرتگ اَنت۔ مارا ھمے گُمان اِنت زالمیں پاکی استان اے بلوچ پُسگاں ٹارچر کنگ ءَ پد شھید کنت ءُ آھانی جتگ ءُ چُپتگیں لاشاں ماں جنگل ءُ دگاں چگل دنت۔ 
جارکش ءَ گُشتگ زالمیں استانی فوج ءَ گوستگیں روچاں پیر کوہ ءَ آپریشن کُتگ ءُ بلوچ کماش شونگل خان ءَ بلوچ گُھار جنت ٹپی کُتگ اَنت۔ بلے ترہجاھے آسراتی یے نہ بیئگ ءِ سوب ءَ اے بلوچ شھید بیتگ اَنت۔ دُنیا ءِ ریپینگ ءُ وت ءَ ماں حبرانی تھا زندگ دارگ ءِ ھاترا پاکی استان دروگ ءِ سرا دروگ بندیت کہ بلوچستان ءَ آپریشن بیئگ ءَ نہ اِنت ۔ بلے کوھستان مری ءُ ڈیرہ بگٹی ” نوگو ایریا” جوڑ کنگ بیتگ اَنت۔ تانکہ پاکی استان وتی بدیں کرداں چیر بِدنت ءُ عالمی انسانی حقانی ادراہ اے ھند ءُ دمگاں سر بیت مہ کناں۔ جارکش ءَ گُشتگ ماں بلوچستان ءَ فوجی آپریشن تیز کنگ بیتگ ءُ مکران ءُ دگہ بازیں ھنداں فوجی آپرشن ءِ یک برے پدا بد تریں رنگے ءَ تیاری بیئگ اِنت۔ اگاں پاکی استان ھمے سرپد بیت کہ ھمے وڑیں زُلم ءُ زوراکیاں آ بلوچ راجی جُنز ءَ ایرموش کنت تا گُڑا اے آئی ءِ بے آسریں توجیلے۔بلوچ راج ھش وڑا چہ راجی جُنز ءَ دزکش نہ بیت۔ بلوچ ءِ ھر یک کسے ھونانی آخری ترمپ ءَ تاں جنگ کنت۔ آئی ءَ انسانی حقانی گل، یو۔این۔او ، امریکا ءُ دگہ یورپی مھلوکاں چہ دزبندی کُتگ کہ آ بلوچ راج ءِ نسل کُشیں ءُ بلوچ ءِ درا زُلم ءُ زوراکی کنوکیں وتگڑیں پاکستانی ریاست ءِ ھلاپ ءَ توار چست بہ کناں۔
Comments[ 0 ]
Post a Comment